Oralda alty ınternet-kazınoǵa tyıym salyndy
ORAL. QazAqparat - Oralda alty ınternet-kazınoǵa tyıym salyndy. Oral qalasynyń prokýratýrasy sot arqyly 777-azino.ru, 777faraon.org, casinoroom.com, elfarts.com, va-bank7.com jáne vulkanroyal.net saıttaryn japty, dep habarlaıdy QazAqparat tilshisi.
BQO prokýratýrasynyń baspasóz qyzmetinen túsken málimetke qaraǵanda, Qazaqstan aýmaǵynda elektrondyq kazıno jáne ınternet-kazıno qyzmetine zańmen tyıym salynǵan. Soǵan qaramastan, atalǵan saıttar onlaın rejımde qumar oıyndaryn ótkizip otyrǵan.
Mysaly, vulkanroyal.net saıtynda qumar oıyndardyń avtomat, slot, rýletka, poker jáne basqa da 30-dan astam túrin oınaýǵa jáne Qiwi, Webmoney, Visa, Mastercard, Maestro, ATF24, Kassa24 aqsha tólemderiniń servısteri arqyly aqsha tigip, utysty alýǵa bolady. Sondyqtan Oral qalasy prokýrory vulkanroyal.net saıtyn zańsyz dep taný týraly sotqa talap aryz berip, ol bıylǵy 12 aqpanda qanaǵattandyryldy. 26 naýryzda Aqparat jáne qoǵamdyq damý mınıstrligi saıtty japty.
Dál osylaı basqa da ınternet-kazınolardyń jumysy toqtatyldy.
Sonymen qatar, ótken jyly prokýratýra men memlekettik kirister organdarynyń birlesken jumysynyń nátıjesinde Oral jáne Aqsaı qalalarynda zańsyz uıymdastyrylǵan 9 oıyn zaly jabyldy. Aıypty bes tulǵa QR Qylmystyq kodeksiniń 307-babymen (zańsyz oıyn bıznesin uıymdastyrý) qylmystyq jaýapkershilikke tartylyp, 44 kompıýterlik tehnıka men 800 myń teńgeden astam qarajat memleket paıdasyna tárkilendi.
