Oralda alkogol ónimderin zańsyz satýdyń 140-tan astam deregi anyqtaldy
ORAL. KAZINFORM — Oral qalasy polıtsııa basqarmasynyń qyzmetkerleri alkogol ónimderin satý salasyndaǵy zańnama talaptaryn buzýdyń 143 deregin anyqtady. Atalǵan derekter boıynsha 128 ákimshilik is qozǵaldy.
BQO polıtsııa departamentiniń baspasóz qyzmetinen málim etkenindeı, sonyń ishinde 8 is — dámhana, 50-i — alkomarket ıelerine, 70-i dúkenderge qatysty.
Kúni búginge deıin 122 is qaralyp, ákimshilik sharalar qoldanyldy. Atap aıtqanda, 54 sýbektiniń lıtsenzııasy úsh aıǵa, 28-iniki – 2, 17 sýbektiniń ruqsaty 1 aıǵa toqtatyldy. Toǵyz sýbekt (1 túngi klýb, sondaı-aq 8 alkomarket pen dúken) lıtsenzııasynan aıyryldy.
- Sonymen qatar zańnama talaptaryn óreskel buzǵany úshin bir dámhana men bir alkomarkettiń qyzmeti toqtatyldy. Zańsyz kásipkerlik qyzmeti úshin 15 kásipkerlik sýbektisi ákimshilik jaýapkershilikke tartyldy. Polıtsııa qyzmetkerleri kásipkerlik nysandary men qoǵamdyq tamaqtaný oryndarynyń ıelerimen turaqty túrde profılaktıkalyq jumystar júrgizip keledi. Kásipkerlerge zańnama talaptary, alkogoldi tyıym salynǵan ýaqytta jáne kámeletke tolmaǵandarǵa satqany úshin jaýapkershilik qarastyrylǵany, sondaı-aq qaıtalanǵan buzýshylyqtardyń saldary lıtsenzııadan aıyrýǵa deıingi jáne qyzmetti toqtatýǵa ákep soǵatyny túsindiriledi. «Zań men tártip» qaǵıdatyn iske asyrý aıasyndaǵy alkogol ónimderin satý salasyndaǵy jumys júıeli túrde jalǵasyp keledi, - dep habarlady vedomstvodan.
Eske sala keteıik, budan buryn BQO-da buryn isti bolǵan 8 adamnyń jazǵy lagerge jumysqa turǵysy kelgenin jazǵan edik.
