Oralda alıment tóleýden jaltarǵan 200-ge jýyq adam jaýapqa tartyldy
ORAL. QazAqparat - Oral qalasy mamandandyrylǵan ákimshilik soty jyl basynan beri alıment óndirý týraly sot aktisin oryndamaǵany úshin 196 adamdy ákimshilik jaýapkershilikke tartty, dep habarlaıdy «QazAqparat» tilshisi.
BQO sotynyń baspasóz qyzmetinen túsken málimetke qaraǵanda, sot oryndaýshylary olardyń atyna bereshekterin óteý týraly birneshe ret habarlama jiberse de, shara qolǵa alynbaǵan.
Sot 196 adamdy QR Ákimshilik quqyqbuzýshylyq kodeksi 669-babyna sáıkes jaýapqa tartty. Sonyń ishinde 124-ine qamaý, 72-sine ákimshilik aıyppul túrindegi jaza qoldanyldy.
