Oralda alǵash ret ulttyq sport túrlerinen ákeler men balalar arasynda jarys ótti
«Oral» sport klýbynyń dırektory Esqabyl Jalmurzıevtiń aıtýynsha, atalmysh jarys ulttyq sportty damytý, otbasy qundylyqtaryn dáripteý maqsatynda uıymdastyryldy.
Óńirge tanymal sport ardagerleri Rýslan Myrzashev pen Qýanysh Ýaqasov balalarǵa batasyn berse, olımpıada rezerviniń oblystyq mamandandyrylǵan mektep-ınternat kolledji dırektory Qanat Janǵalıev at sportynyń adam ómirindegi, bala damýyndaǵy mańyzy zor ekendigin jetkizdi.
Ákeli-balaly 12 jup sadaq atý, serke ilý, kermege tartylý, aýdaryspaq syndy naǵyz jigitter saıysyna túsip, salt-dástúr, at sporty men jylqyǵa qatysty saýaldarǵa jaýap berdi.
Bul kúni ákeler óz uldarynyń at jalyn tartyp, ulttyq sport túrlerine tóselgenin kórip, ózderi de namysqa tyrysty. Ásirese, aýdaryspaqta, serke ilýdegi balalarynyń eptiligine tánti boldy.
Jınalǵan jurtshylyq at sporty naǵyz bilekti, júrekti jigitterdiń isi ekenine taǵy bir kóz jetkizdi. Sharanyń maqsaty da at jalyn tartyp, ata jolyn qýǵan jetkinshekterdiń isin ákelerge kórsetý, eki aradaǵy berik qarym-qatynasty nyǵaıtý bolatyn.
Saıys qorytyndysynda Oralhan Baqtygereev pen onyń uly Nurdáýlet Maǵzom jeńimpaz atandy. Ábilqaıyr Ahmetov pen Dııas Súıinǵaraev ekinshi, Nurlan Ahmeshev pen Arsen Muratqalı úshinshi orynǵa ıe boldy.
Júldegerler dıplommen, jarysqa qatysýshylar alǵyshat, baǵaly syılyqtarmen marapattaldy.
