Oralda alǵash ret ótken respýblıkalyq monospektaklder festıvali máresine jetti

ORAL. QazAqparat – Oralda H.Bókeeva atyndaǵy oblystyq qazaq drama teatrynyń 30 jyldyǵy men Hadısha Bókeevanyń týǵanyna 105 jyl tolýyna oraı uıymdastyrylǵan І respýblıkalyq monospektaklder festıvali máresine jetti, dep habarlaıdy QazAqparat tilshisi.

Sahna padıshasy Hadısha Bókeevanyń esimin ulyqtaý maqsatynda tuńǵysh ret ótken festıvalge Almaty, Astana, Shymkent, Atyraý, Qaraǵandy, Óskemen, Pavlodar, Semeı, Aqtóbe qalalaryndaǵy teatr ujymdary qatysty.

Óner baıqaýyna Qazaqstannyń halyq ártisi, Memlekettik syılyqtyń laýreaty, akter, rejısser, Hadısha Bókeevanyń shákirti Tuńǵyshbaı Jamanqulov bastaǵan qazylar alqasy tórelik etti.

Festıval qorytyndysynda Ý.Shekspırdiń «Korol Lır» (rejısseri Ádilet Aqanov) tragedııasyn usynǵan J.Aımaýytov atyndaǵy Pavlodar oblystyq qazaq mýzyka-drama teatry «Úzdik stsenografııa», J.Anýıdiń «Medeıa» tragedııasynda (rejısseri Qýandyq Qasymov) Medeıany somdaǵan J.Shanın atyndaǵy Shymkent qalalyq akademııalyq qazaq drama teatrynyń aktrısasy Baqytkúl Qojamuratova «Úzdik áıel adam beınesi», Ý.Shekspırdiń «Gamletinde» (rejısseri Meıram Habıbýllın) Gamletti sahnaǵa shyǵarǵan Aqtóbe qalasyndaǵy T.Ahtanov atyndaǵy Aqtóbe oblystyq drama teatrynyń aktery Baǵdat Teleýǵalıev «Úzdik er adam beınesi» atalymymen marapattaldy.

Sondaı-aq S.Seıfýllın atyndaǵy Qaraǵandy oblystyq akademııalyq qazaq drama teatrynyń kórkemdik jetekshisi – bas rejısseri Aıdyn Salban Q.Qýanyshbaev atyndaǵy memlekettik akademııalyq qazaq mýzykalyq drama teatrynda Sh.Aıtmatovtyń «Ana men Ala» dramasyn sahnalaǵany úshin «Úzdik rejıssýra» atalymyna ıe boldy. Teatr 30 jyldyǵynyń arnaıy júldesi Sh.Aıtmatovtyń «Іzde» sıýrrealızmin (rejısseri Gaýhar Adaı) el nazaryna usynǵan Semeı oblysynyń «Darıǵa-aı» jastar teatryna tapsyryldy.

Qazylar alqasynyń sheshimimen festıvaldiń Gran-prı syılyǵy berilgen joq.

«Mártebeli óner baıqaýy barysynda úsh kún boıy monospektaklder qoıylyp, sarapqa salyndy. Mundaı festıvalder óskeleń urpaqqa, sonyń ishinde teatr ónerine eńbek sińirip júrgen jastarǵa kerek. Bul festıval Aq Jaıyq óńirinde de teatr óneriniń damyp kele jatqandyǵyn kórsetti», dedi jazýshy-dramatýrg Murat Qolǵanat.

H.Bókeeva atyndaǵy BQO qazaq drama teatrynyń 30 jyldyǵyna oraı aldaǵy ýaqytta da is-sharalar uıymdastyrylatyn bolady.