Oralda áleýmettik jelide analardy aldap kelgen alaıaq qyz ustaldy
ASTANA. QazAqparat - BQO-da 18 jastaǵy qyz Instagram-da ınternet-dúken ashyp, balalar zattaryna tapsyrys jınaǵan, dep habarlaıdy «Moı gorod».
Oral ІІD bastyǵynyń birinshi orynbasary Nurlan Bısenovtiń sózine qaraǵanda, jas qyz kelinshekterdi aldap, zattardyń aldyn ala aqshasyn jınap alǵan, biraq taýardyń ózin bermegen.
«Klıentterine ózin Elena dep tanystyrǵan Zelen aýdanynyń týmasy áleýmettik jelidegi paraqshalaryna balalar zattarynyń fotolaryn salyp, aqsha jınaǵan. Budan tys, WhatsApp-ta «Sovmestnye zakýpkı» degen top ashyp, oraldyq áıelderden tapsyrys qabyldaǵan. Sosyn ol klıentterine óziniń arnaıy bir kúni qalada bolyp, taýarlaryn taratatynyn aıtqan. Aqshany ol kıvı-koshelek arqyly jınaǵan. Onyń bárin boıjetken óz qajetine jaratyp jibergen», - dep málimdedi Nurlan Bısenov. Ol ár adamnan ártúrli - 4 myńnan 25 myń teńgege deıin aqsha jınaǵan.
9 qazanda boıjetken ustalyp, ýaqytsha ustaý oqshaýlaǵyna toǵytyldy. Osy fakti boıynsha Qazaqstan Respýblıkasy Qylmystyq Kodeksiniń 190-baby («Alaıaqtyq»), 2-bóligine sáıkes qylmystyq is qozǵaldy.
Polıtsııa qyzdan jábir kórgenderdiń barlyǵynan Oral qalalyq ishki ister departamentine habarlasýyn suraıdy.
