Oralda álem chempıony Asqar Shaıhıevti eske alýǵa arnalǵan halyqaralyq týrnır bastaldy
ORAL. QazAqparat - Búgin Oral qalasynda sambodan álem chempıony, álem kýbogynyń ıegeri, Qazaqstannyń eńbek sińirgen sport sheberi Asqar Shaıhıevti (1963-2000) eske alýǵa arnalǵan 23 jasqa deıingiler arasynda halyqaralyq týrnır bastaldy, dep habarlaıdy QazAqparat.
Sporttyq sambodan ótip jatqan aıtýly dodaǵa Armenııa, Qyrǵyzstan, Qytaı, Ózbekstan, Reseı, Tájikstan elderimen qatar Almaty qalasy, Aqtóbe, Atyraý, Mańǵystaý, Ońtústik Qazaqstan, Shyǵys Qazaqstan, Almaty jáne Batys Qazaqstan oblystarynyń jas palýandary qatysýda. Olar 48, 52, 57, 62, 68, 74, 82, 90, 100 jáne 100 keliden joǵary salmaq dárejelerinde kúsh synasýda. Oǵan qosa áskerı sambodan 62 jáne 74 kg salmaqta erler kilemge shyqpaq.
Týrnırdiń ashylý rásimine qatysqan oblys ákiminiń orynbasary Marat Toqjanov óńirde sambo kúresiniń áýelden jaqsy damyǵanyn, myqty dástúri bar ekendigin aıta kelip, sportshylarǵa sáttilik tiledi. Sondaı-aq QR sporttyq jáne áskerı sambo federatsııasynyń vıtse-prezıdenti Marat Muhambetjanuly, Asqar Shaıhıevtiń zaıyby Aıagóz Májikenqyzy izgi tilekterin bildirdi. 
Jeksenbi kúni márege jetetin jarys jeńimpazdary 50 myń teńge, kúmis júlde alǵandar 30 myń jáne qola medal ıeleri 15 myń teńge kóleminde aqshalaı syıaqy alyp, oblystyq dene shynyqtyrý jáne sport basqarmasynyń dıplomymen, medaldarymen marapattalady.
Aıta keteıik, Syrym aýdanynda týyp-ósken Asqar Shaıhıev 1989 jyly Nıý-Iorkte ótken álem chempıonatynda jeńimpaz atanǵan bolatyn. Bapkeri Qazaqstannyń eńbek sińirgen jattyqtyrýshysy, marqum Batyr Qýanyshev edi.
