Oralda aldaǵy jyldary on alty kóp qabatty turǵyn úı salynbaq
ORAL. QazAqparat - Oralda aldaǵy jyldary on alty kóp qabatty turǵyn úı salynbaq. Bul týraly óńirlik kommýnıkatsııalar qyzmeti alańynda qala ákimi Murat Muqaev málim etti, dep habarlaıdy «QazAqparat» tilshisi.
Onyń aıtýynsha, sonyń 9-y Zachagan kentinde, jeteýi qalanyń soltústik-shyǵys bóliginde boı kótermek. Qazirgi kezde jobalyq-smetalyq qujattamasy jasalǵan, barlyǵy 1800 páterden turatyn bul úılerdiń qurylysy 2018-2019 jyldary bastalmaqshy.
Bıyl «Nurly jer» baǵdarlamasy aıasynda jalpy aýdany 70 myń sharshy metr bolatyn 1180 páterlik 8 turǵyn úı, 12 ınjenerlik-kommýnıkatsııalyq ınfraqurylym nysanyn salý kózdelse, toǵyz aı ishinde «Báıterek Development» AQ arqyly «Turǵynúıqurylysjınaq bankiniń» salymshylary úshin 4 úıdiń qurylysy bitti. Sondaı-aq memlekettik-jekeshelik áriptestik negizinde Depovskaıa kóshesindegi apatty úıdiń ornyna jańa ǵımarat salynyp, paıdalanýǵa berildi. Taǵy úsh úıdiń qurylysy jyl sońyna deıin aıaqtalmaqshy.
Degenmen turǵyndarǵa jer telimin berý máselesi ózekti kúıinde qalyp otyr. Kúni búgin 70885 adam jer telimin alý kezeginde tur. 2000-2012 jyldary 15 myń adamǵa jer telimi berilip, sodan keıin toqtatylǵan bolatyn. Qazirgi tańda «Nurly jer» baǵdarlamasyna sáıkes qalaǵa qarasty Krýgloozernyı aýyldyq okrýgi aýmaǵynan turǵyndarǵa jer telimin berý úshin ınjenerlik jeli tartý men áleýmettik nysandar qurylysyna qatysty jobalyq qujattar ázirlenýde.
Bıyl qalada 20 aýla aýmaǵyn abattandyrýǵa bıýdjet esebinen 507 mln teńge bólinip, bul jumystar tolyqtaı márege jetti. Jalpy abattandyrylǵan aýla sany 54-ke (3440 páter, 10 myń turǵyn) jetti. 2018 jyly taǵy 29 aýla aýmaǵyn abattandyrý kózdelýde.
Turǵyn úı-kommýnaldyq sharýashylyǵyn jańǵyrtý jáne damytý baǵytynda 2017 jyly 7 úıge kúrdeli jóndeý josparlanǵan bolatyn. Kúni búgin 80 mln teńgege 4 turǵyn úı jóndeldi.
Memlekettik-jekeshelik áriptestik negizinde Gagarın kóshesi 1-mekenjaıyndaǵy úı buzylyp, onyń ornyna 126 páterlik turǵyn úı qurylysyn «Karavannyı pýt» JShS bastap ketti. Sonymen qatar Qurmanǵazy kóshesi 198-mekenjaıyndaǵy úıdiń ornyna 64 páterlik úıdi salýǵa «KazHol» JShS kirisýde. Oǵan qosa Ǵ.Qarash kóshesi 33/1 jáne Ǵ.Qurmanǵalıev kóshesi 3-mekenjaıyndaǵy úılerdi buzyp, ornyna jańasyn turǵyzý úshin páter ıelerimen túsinik jumystary júrgizilýde.
