Oralda aldaǵy eki jylda 3 magıstraldyq jylý jelisin jańǵyrtý kózdelip otyr
ORAL. KAZINFORM — Oral qalasynda kommýnaldyq jelilerdi jańǵyrtý baǵytynda birqatar mańyzdy jobalar júzege asyrylyp jatyr.
Oral qalasynyń ákimi Murat Baımenovtiń turǵyndarmen kezdesýde málim etkenindeı, ótken jyly shaharda 1,3 mlrd teńgege bir magıstraldyq jylý jelisin qaıta jańǵyrtý jumystary aıaqtaldy.
Murat Bolatulynyń sózine qaraǵanda, sonyń nátıjesinde 63 kópqabatty turǵyn úı men 12 áleýmettik nysan turaqty jylýmen qamtyldy.
- Bıyl quny 9,9 mlrd teńge bolatyn iri magıstraldyq jylý jelisin rekonstrýktsııalaý jumystary júrgizildi. Joba nátıjesinde 75 kópqabatty turǵyn úı men 7 áleýmettik nysan turaqty ári sapaly jylýmen qamtamasyz etildi. Aldaǵy eki jyl ishinde taǵy 3 magıstraldyq jelini jańǵyrtý josparlanǵan. Bul maqsatqa 8,1 mlrd teńge bólinip, tıisti jumystar atqarylǵan kezde qalanyń 50 paıyz jylý jelisi jańartylady, - dedi shahar basshysy.
Onyń aıtýynsha, sonymen qatar aýyz sýmen qamtý baǵytynda barlyq 22 sý jınaý uńǵymasy qalypqa keltirilip, 22 tereńdik sorǵy ornatyldy. Qazirgi ýaqytta óndiriletin sý kólemi sońǵy bes jylmen salystyrǵanda, táýligine 19 myń tekshe metrge ulǵaıyp, sý tapshylyǵy máselesi ishinara sheshimin tapty.
Oǵan qosa bıyl 12,1 mlrd teńgege eki iri sý jınaý stantsııasyn rekonstrýktsııalaý jumystary júrgizilip jatyr. Bul jobalar qalanyń «Juldyz», Eski áýejaı, 10, 7, 6, 5, 4-shaǵynaýdandaryn úzdiksiz aýyz sýmen qamtamasyz etýge múmkindik beredi. Budan bólek, taǵy 5 sý uńǵymasyn salý boıynsha jobalyq-smetalyq qujattar ázirlendi.
- Osy oraıda sýdy únemdeýdiń mańyzdylyǵyn aıta ketkim keledi. «Sýdyń da suraýy bar» deıdi halqymyz. Ókinishke qaraı, qalada taza aýyz sýdy kólik jýý nemese baý-baqsha sýarý sekildi maqsattarǵa shekten tys paıdalaný jaǵdaılary jıi kezdesedi. Sondyqtan turǵyndar sýdy únemmen jumsaı bilýi kerek. Al shaǵyn jáne orta kásip ıelerine sýdy únemdeýmen qatar ony qaıta óńdeýde álemdik tájirıbege súıený kerektigin eske salamyn, - dedi M.Baımenov.
Qala ákimdiginiń derekterine sáıkes ótken jyly 4,6 mlrd teńgege № 3 jáne № 2 káriz-sorǵy stantsııalary jańartylsa, bıyl «Aqjaıyq» shaǵynaýdanynda jańa káriz-sorǵy stantsııasy paıdalanýǵa berildi. Qazirgi tańda 2 mlrd teńgege № 18A káriz-sorǵy stantsııasyn qaıta jańǵyrtý jumystary júrgizilip jatyr. 2026 jyly taǵy eki nysan – № 29 jáne № 1 káriz stantsııalaryn qaıta jańǵyrtýǵa 4,1 mlrd teńge kóleminde qarajat baǵyttaý kózdelip otyr. Osy jobalar iske asqanda, sýmen jabdyqtaý jelileriniń tozý deńgeıi 55-ten 52 paıyzǵa deıin azaıady.
Taǵy bir mańyzdy másele – qaladaǵy elektr jelileriniń tozǵandyǵy. 2024 jyly 207 kılometr elektr jelileri jańǵyrtyldy. Bıyl 12,2 km jelini jańartý jumystary bastaldy.
- Oblys ortalyǵynda apattyq jaǵdaılardyń aldyn alý maqsatynda 3,6 mlrd teńgege 168 km elektr jelilerin qaıta qurý jobasy júzege asyrylýda. Sonyń aıasynda 1,1 mlrd teńgege uzyndyǵy 51 km 0,4 kV áýe jelisin aýystyrý bastaldy. Bul jumystar atqarylǵan kezde elektr jelileriniń tozýy 72-den 63 paıyzǵa deıin tómendeıdi, - dep qosty qala ákimi.
Eske sala keteıik, budan buryn Batys Qazaqstanda qandaı jylý nysandary jańartylyp jatqanyn jazǵan bolatynbyz.