Oralda alaıaqtyqpen aınalysqan jalǵan polıtsııa qyzmetkeri quryqtaldy

ORAL. KAZINFORM – Oral qalasynda ózin polıtsııa qyzmetkeri retinde tanystyrǵan 30 jastaǵy alaıaq ustaldy.

BQO polıtsııa departamentiniń baspasóz qyzmetinen málim etkenindeı, ol ózin uıymdasqan qylmyspen kúres basqarmasynyń qyzmetkerimin dep tanystyryp, aıyppul tóleý qajettiligi týraly jalǵan syltaýmen 1983 jylǵy áıeldiń aqshalaı qarajatyn zańsyz ıemdengen.

- Atalǵan derek boıynsha jedel izdestirý is-sharalary barysynda BQO polıtsııa departamentiniń ózindik qaýipsizdik basqarmasy men arnaıy maqsattaǵy bólimshe qyzmetkerleri 1995 jylǵy kúdiktini qolǵa túsirdi. Ol óz kinásin tolyq moıyndady. Tintý kezinde bank qosymshasynan úzindi kóshirme jáne eki uıaly telefon tárkilendi. Qazirgi ýaqytta atalǵan derek boıynsha QR QK 190-baby 1-bóligine (alaıaqtyq) sáıkes sotqa deıingi tergep-tekserý amaldary júrgizilýde, - dep habarlady vedomstvodan. 

Atalǵan bap boıynsha aıypty dep tanylǵan adam múlki tárkilenip, bir myń aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna ne alty júz saǵatqa deıingi merzimge qoǵamdyq jumystarǵa tartýǵa ne eki jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady.

Aıta keteıik, budan buryn alaıaqtar BQO turǵyndaryna 280 mln-ǵa jýyq teńge shyǵyn keltirgenin jazǵan bolatynbyz.