Oralda alaıaqtyqpen aınalysqan mekeme býhgalteri 5 jylǵa sottaldy
ORAL. KAZINFORM – Oral qalalyq sotynyń úkimimen «Oral aýyl sharýashylyǵy tájirıbe stantsııasy» JShS býhgalteri aıypty dep tanyldy.
BQO qoǵamdyq keńesiniń múshesi, zańger Baýyrjan Ahmetjannyń Facebook áleýmettik jelisindegi paraqshasynda málim etkenindeı, atalǵan mekeme ujymy qarjy jymqyrylyp, sonyń saldarynan qyzmetkerler jalaqysyz, zeınetaqy, áleýmettik, medıtsınalyq tólemdersiz qalǵany jóninde shaǵym túsirgen.
Sotta anyqtalǵanyndaı, býhgalter «Oral aýyl sharýashylyǵy tájirıbe stantsııasy» JShS-ǵa jumysqa alý jónindegi ótinish pen kelisimshartqa qol qoımaǵan. Biraq ol mekemede naqty jumys istep, dırektordyń ETsQ-syna (elektrondy tsıfrlyq qoltańba) kirip, JShS qarjysyn óziniń kartalyq shottaryna aýdaryp otyrǵan.
- 2023 jyldyń 16 qazanynan 2024 jyly 1 naýryzǵa deıin bas býhgalterdiń kabınetinde otyryp, «Online bank» júıesi boıynsha jalaqy esebinen dep, óziniń bank shottaryna 26,8 mln teńge aýdarǵan. Jumys istegen bes aıda 53 aýdarym jasaǵan. Qarjy kólemi ár túrli – 30 myńnan 5 mln teńgege deıin. Al 2024 jyldyń 8 aqpany kúni 13 mln teńgeni aýdarǵan, - deıdi B.Ahmetjan.
Onyń sózine qaraǵanda, býhgalter býkmekerlik keńselerdegi óziniń akkaýnttaryna 8,4 mln teńge aýdaryp, bás tigýden 3,3 mln teńge zańsyz paıda tapqan.
Býhgalter QR QK 190-baby (asa iri kólemdegi alaıaqtyq) jáne 218-babyna (qylmystyq jolmen alynǵan aqshany zańdastyrý) sáıkes aıypty dep tanylyp, 5 jylǵa bas bostandyǵynan aıyrý jazasyn qaýipsizdigi ortasha qylmystyq-atqarý júıesi mekemesinde óteýge sottaldy.
Eske sala keteıik, budan buryn Oralda oıyn alańynda 7 jasar bala saýsaǵyn kesip alǵanyn jazǵan edik.