Oralda alaıaqtarǵa aqsha jetkizip otyrǵan 18 jastaǵy jigit ustaldy
BQO polıtsııa departamenti baspasóz qyzmetinen túsken málimetke qaraǵanda, «Kıberpol» qyzmetkerleri jedel izdestirý is-sharasy barysynda 18 jastaǵy kúdiktini anyqtap, qolǵa túsirdi.
Áleýmettik jelidegi Telegram qosymshasy arqyly jumysqa turǵan ol qyzmetiniń qylmystyq áreket ekenin bile tura, aldanǵan adamdardyń aqshalaryn alaıaqtarǵa jetkizip otyrǵan.
Atap aıtqanda, 3 tamyz kúni saǵat 11.00 shamasynda ózin polıtsııa qyzmetkerimin dep tanystyrǵan belgisiz bireý túrli nómirlerden 75 jastaǵy keıýanaǵa telefon shalǵan. Ol jol-kólik oqıǵasyna kináli dep tanylǵan týysyn qylmystyq jaýapkershilikke tartpaýǵa kómektesemin dep, kýrer arqyly zeınetkerdiń áýeli 3500 eýro men 3500 dollaryn ıemdengen. Muny mise tutpaı, qaıta telefon soǵyp, qosymsha 8 mln teńge talap etken.
Ekinshi oqıǵa da osyǵan uqsas. Bul joly deldal alaıaqtarǵa Oralda turatyn 80 jastaǵy qarııanyń 4 myń AQSh dollary men 68 myń rýblin aparyp bergen.
«Atalǵan derekter boıynsha QR QK 190-babyna (alaıaqtyq) sáıkes sotqa deıingi tergeý amaldary júrgizilip jatyr. Atalǵan kúdiktiniń basqa da qylmystarǵa qatysy bar-joǵy anyqtalý ústinde», - dep habarlady vedomstvodan.