Oralda alaıaqtar úı alyp berem dep 30-ǵa jýyq adamdy aldaǵan
ORAL. QazAqparat - Oralda úı alyp beremin dep 27 turǵyndy taqyrǵa otyrǵyzyp ketken alaıaqtardyń isi tergelýde, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, qylmystyq is QR QK 190-babyna (alaıaqtyq) sáıkes qozǵaldy.
Oraldyq alaıaqtar «7-20-25» baǵdarlamasy arqyly kezeksiz úı alyp beremin dep azamattardyń aqshasyna ıemdenip ketken.
Aldanǵandar alaıaqtarǵa 75 myńnan bastap 1 mln teńgege deıin aqshasyn ustatyp jibergen. Kúni búgin polıtsııaǵa oblystyń 27 turǵynynan aryz túsken. Áıtse de tergeý boljamy boıynsha jábirlenýshiler sany odan kóp bolýy múmkin.
«Fotoda kórsetilgen adamdardan zardap shekkender Batys Qazaqstan ǵana emes, basqa oblystarda da bolýy yqtımal. Ondaılar bolsa, turǵylyqty jerdegi polıtsııa bólimine shaǵymdana alady nemese (7112) 98-42-61, 98-42-59, 98-42-54 jáne 102 telefonyna habarlassa, jetip jatyr. Alaıaqtardyń arbaý áreketi ár túrli, sondyqtan turǵyndarǵa abaı bolyńyzdar degimiz keledi», dep habarlady BQO polıtsııa departamentiniń baspasóz qyzmeti.
