Oralda alaıaqqa sengen zeınetkerler 10,8 mln teńgesinen aıyryldy
BQO polıtsııa departamenti krımınaldyq polıtsııa basqarmasy bastyǵynyń orynbasary, polıtsııa polkovnıgi Nurlan Bısenovtiń málim etkenindeı, maýsymnyń 17-sinen bastap qarııalardy aldaýdyń 9 deregi tirkelgen.
Onyń sózine qaraǵanda, sonyń ishinde 2 derek boıynsha QR 190-babyna sáıkes kúdiktiler anyqtalǵan. Qalǵandary boıynsha jedel izdestirý is-sharalary júrgizilýde.
Aldanǵandardyń 8-i keıýana bolsa, bireýi – egde jastaǵy er adam. Olar 10,8 mln teńgesinen aıyryldy.
«Alaıaqtar belgisiz nómirden habarlasyp, ózderin quqyq qorǵaý organdarynyń qyzmetkeri retinde tanystyryp, týysqany jol apatyna ushyrady nemese sonyń kinásinen adam zardap shekti dep, ony jaýapkershilikten bosatý úshin belgili bir kólemde aqsha kerektigin jetkizedi. Sosyn qarııalardyń esin jıǵyzbaı, eshkimge habarlasýyna múmkindik bermeı, talap etken aqshany kýrer arqyly berip jiberýin jáne ol kelgenshe telefon tutqasyn qoımaýdy suraıdy. Alaıaqtar kóbinde úı telefonyna qońyraý shalyp aldaǵan», - deıdi N.Bısenov.
Basqarma bastyǵy orynbasarynyń aıtýynsha, jyl basynan beri óńirde 410 alaıaqtyq qylmys (ótken jyly osy merzimde – 685) tirkelip, sonyń 200-i anyqtalyp, sotqa joldandy.
Jalpy, alaıaqtyqtyq derekteriniń aldyn alý baǵytynda BQO PD bastyǵynyń buıryǵymen arnaıy top quryldy.
Arnaıy kompıýterlik tehnıkamen jabdyqtalǵan, úzdik polıtsııa qyzmetkerleri, tergeýshiler, jedel ýákilderden quralǵan top alaıaqtardy anyqtaý, olardyń áreketine jol bermeý úshin jumys jasaýda.
Eger alaıaqtardyń qylmysy dáleldense, 3 jyldan 7 jylǵa deıin bas bostandyǵynan aıyrý jazasy qarastyrylǵan.
«Eger bireýler osyndaı qońyraý shalsa, kez kelgen syltaýmen áńgimeni úzip, sol týysqanyńyzǵa habarlasyńyz. Eger onyń telefony óshirýli bolsa, basqa týystarǵa qońyraý shalyp, máseleni anyqtap alyńyz. Polıtsııa ne prokýratýra qyzmetkeri olaı qońyraý shalmaıdy. Eń bastysy, saq bolyńyz. Telefondy tastap, dereý alaıaqtyq týraly polıtsııaǵa habarlańyz», - dedi Nurlan Bısenov.
