Oralda alaıaq qala turǵyndaryn 15 mln teńgege otyrǵyzyp ketken
ORAL. QazAqparat - Oralda bıylǵy alty aıda alaıaqtyq qylmysy ótken jylǵy osy kezeńmen salystyrǵanda, 6,9 paıyzǵa (420-dan 449-ǵa) kóbeıip otyr, dep habarlaıdy «QazAqparat» tilshisi.
BQO prokýratýrasynyń baspasóz qyzmetinen túsken málimetke qaraǵanda, taldaý kórsetkenindeı, osynaý qylmystyń 22 paıyzy jıhaz daıyndaý men ornatý jeleýimen jasalǵan alaıaqtyq úlesine tıedi. Mysaly, T. degen azamat OLX saıtynda tapsyrysqa jıhaz jasaımyn dep habarlandyrý ornalastyrǵan. Qala turǵyndaryn aldaý úshin jalǵan kelisimshart jasap, qarjynyń 30 paıyzyn alyp, tapsyrys berýshilerden boı tasalap otyrǵan. Alaıaqtyń qarmaǵyna Oraldyń 98 turǵyny iligip, olarǵa 15 mln teńge kóleminde zalal keltirilgen.
Aıta keteıik, qala aýmaǵynda bıylǵy birinshi jartyjyldyqta barlyǵy 4500 qylmystyq quqyqbuzýshylyq tirkelgen, bul ótken jylǵydan 10,1 paıyzǵa kem.
