Oralda alańda myńnan astam adam Memlekettik gımndi shyrqady

ORAL. QazAqparat – Oral qalasyndaǵy Memlekettik rámizder kúnine oraı tuńǵysh Prezıdent alańynda saltanatty is-shara ótti, dep habarlaıdy QazAqparat tilshisi.

Saltanatty jıynda Memlekettik gımn oryndalyp, ony alańǵa jınalǵan myńnan astam adam qosyla shyrqady.

Aq Jaıyq jurtshylyǵyn merekemen Batys Qazaqstan oblysynyń ákimi Narıman Tóreǵalıev quttyqtady.

«1992 jyly 4 maýsymda alǵash ret Táýelsiz Qazaqstannyń jańa memlekettik rámizderi bekitildi. Bul kún rýhymyzdy asqaqtatyp, Otanǵa degen súıispenshiligimizdi pash etetin erekshe kún retinde elimizdiń tarıhynda máńgi qaldy. Jer betinde myńdaǵan ulttar bar. Olardyń arasynda sany jaǵynan bizdiń halyqty san orap ketetini de kezdesedi. Alaıda, óziniń táýelsiz memleketin qurý olardyń bárine birdeı buıyrmaǵan. Alyp planetadan týyn tiger alaqandaı tóbe taba almaı júrgen ulttar qanshama. «Baq baǵalaǵannyń basynda turady», sondyqtan, basymyzǵa qonǵan baqty baǵalaı bileıik.

Memlekettik rámizder — eń aldymen eldigimizdiń, myzǵymas birligimizdiń belgisi, ulttyq sana-sezim men otansúıgishtiktiń sımvoly. Onyń qasıettiligi sol, Otannyń ózi naq osy Týdan, Eltańba men Gımnnen bastaý alady. Olardy júrekke basyp, mańdaıǵa tıgizip qadirleý arqyly egemen eldiń eńsesin bıiktetemiz. Memlekettik rámizderimiz alǵashqy qazaqstandyq ǵaryshkerlermen birge ǵaryshta da bolyp qaıtty. Osynyń bári – tarıh. Naq osy memlekettik rámizder – bizdiń egemendigimizdiń myzǵymas negizderiniń biri. Mereke qutty bolsyn! Memleketimiz nyǵaıa bersin!», - dedi óńir basshysy.

Oblys ákimi elimiz ben óńirdiń damýyna súbeli úles qosyp kele jatqan ár salanyń úzdikterine alǵyshattar tabys etti.

QR Memlekettik rámizder kúnine arnalǵan saltanatty is-sharalar oblystyń barlyq aýdanynda uıymdastyryldy.

Foto - Rafhat Halelov