Oralda «Aqjol» jabyq bazarynan órt shyqty

ORAL. QazAqparat – Oralda «Aqjol» jabyq bazarynan órt shyqty, dep habarlaıdy QazAqparat tilshisi.

BQO TJ departamentiniń baspasóz qyzmetinen málim etkendeı, oqıǵa 27 mamyr kúni Qurmanǵazy kóshesi, 208/2-mekenjaıynda bolǵan.

«Tańǵy saǵat 05.00-de ortalyq bazardyń ishinde ornalasqan «Aqjol» jabyq bazarynda azyq-túlik ónimderin satatyn 3 býtık otqa orandy. Órttiń aýmaǵy 20 sharshy metrdi qamtydy. «Tilsiz jaý» saǵat 05.25-te oqshaýlanyp, 05.43-te tolyqtaı aýyzdyqtaldy. Zardap shekkender joq. Qazirgi kezde órttiń shyǵý sebebi, keltirilgen shyǵyn anyqtalý ústinde», dep habarlady vedomstvodan.

Eske sala keteıik, budan buryn Oralda turmystyq qaldyqtar polıgonynda qoqys órtenip jatqanyn jazǵan bolatynbyz.

Polıgondaǵy órtti sóndirý jumystary jalǵasýda.