Oralda «Aqjaıyq» shaǵynaýdanynda aldaǵy jyly turǵyn úı salý bastalady
NUR-SULTAN. QazAqparat – Oral qalasyndaǵy «Aqjaıyq» shaǵynaýdanynda aldaǵy jyly turǵyn úı salý jumystary bastalady, dep habarlaıdy QazAqparat tilshisi.
Oblys ákimi Ǵalı Esqalıevtiń Ortalyq kommýnıkatsııalar qyzmeti alańynda ótken brıfıngide málim etkenindeı, bul iri joba óńirdiń qurylys salasynyń damýyna tyń serpilis bereri sózsiz.
Qazirgi tańda ınjenerlik jeliler ótkizilip, turǵyn úıler salýǵa alǵashqy ınvestorlar da anyqtaldy.
Prezıdentimiz «Azamattardyń áleýmettik ál-aýqaty eń aldymen turǵyn úı máselesimen tyǵyz baılanysty» dep atap kórsetken bolatyn.
Osy jyly «Nurly jer» memlekettik baǵdarlamasy sheńberinde 17 kóppáterli turǵyn úıge (2503 páter) jáne aýyldyq jerdegi 139 turǵyn úı (474 páter) qurylysyna 21,1 mlrd. teńge qarajat bólindi.
Ákimniń sózine qaraǵanda, jyl aıaǵyna deıin kezekte turǵandar men «Turǵyn úı qurylys jınaq bankiniń» salymshylaryna bıýdjet qarajaty esebinen 1083 páter berý josparlanýda. Bul ótken jylmen salystyrǵanda, 1,8 esege kóp.
Oral qalasynda turǵyn úı salýǵa jer kezeginde turǵan azamattarǵa sońǵy ret jer telimi 2011 jyly ǵana berilgen.
Bul rette óńirde tıisti kommýnıkatsııalarmen qamtamasyz etilgen áleýmettik jeke úıler salý úshin Oral qalasy men aýdandarda jer telimderin usyný baǵytynda jumystar atqarylýda. Mysalǵa, Oral qalasynyń Krýgloozernyı kentinde 1 141 ýchaskege arnalǵan egjeı-tegjeıli josparlaý jospary aıaqtala keldi. Aldaǵy jyly ınjenerlik-kommýnıkatsııalyq jeliler ótkizilgen soń, kezekte turǵan azamattarǵa jer telimderi berile bastaıdy.
«Sondaı-aq Terekti aýdanyna qarasty Fedorov aýylynda 528 jer telimi jáne Qaratóbe aýdanynda 144 jer telimi daıyndaldy. Bul jumystar aýyldaǵy aǵaıyndardyń turǵyn úı máselesin sheshýge jáne aýyl azamattarynyń oblys ortalyǵyna mıgratsııasyn azaıtýǵa sep bolady», dedi Ǵ.Esqalıev.
Eske sala keteıik, budan buryn BQO-da paıdalanylmaı jatqan 909,8 myń gektar aýyl sharýashylyǵy jeri anyqtalǵanyn, ónerkásip óniminiń kólemi 1,4 trln teńgege jetkenin jazǵan bolatynbyz.
