Oralda «Aqjaıyq polıtsııa arýy» anyqtaldy
ORAL. QazAqparat – Oralda 8 naýryz – Halyqaralyq áıelder kúnine oraı «Aqjaıyq polıtsııa arýy – 2020» baıqaýy márege jetti, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, oǵan osy salada jumys isteıtin 11 arý qatysyp, baq synady.
Qatysýshylar saıystyń alǵashqy bóliminde ózderin tanystyryp, mamandyq tańdaý sebebin aıtyp, ómiri men qyzmetindegi erekshe este qalarlyq sátterimen bólisti. Sodan keıin shyǵarmashylyq ónerlerin ortaǵa saldy. Sonymen qatar Makarov tapanshasymen nysana kózdeýden jarysqa túsip, ulttyq salt-dástúrge qatysty saýaldarǵa jaýap berdi. Úı tapsyrmasyna sáıkes qazaqtyń ulttyq taǵamdaryn daıyndap ákelse, eń sońynda ulttyq kıim úlgileri kórsetildi.
Baıqaý qorytyndysynda qazylar alqasynyń sheshimimen BQO polıtsııa departamenti kóshi-qon qyzmeti basqarmasynyń qyzmetkeri, polıtsııa serjanty Gaýhar Teleýbaeva jeńimpaz atandy.
Báıterek aýdany polıtsııa bóliminiń tergeýshisi, polıtsııa aǵa leıtenanty Raýshan Aıtmuhambetova ekinshi, Oral qalasy polıtsııa basqarmasy aqparat jáne baılanys bóliminiń ınspektory, polıtsııa aǵa leıtenanty Aınur Úmbetova úshinshi orynǵa ıe boldy.
Sondaı-aq Móldir Nurqaıatova «Kórermen kózaıymy», Áıgerim Mahmýd «Mergen arý», Laýra Ǵabbasova «Taǵamynan bal tamǵan aspaz arý», Aıdana Ábdirahmanova «Symbatyna jarasqan ulttyq kıim», Ásem Nurlan «Qyz erkem – ónerimen kórkem», Aıdana Meńdibekova «Sóz sheberi», Janar Ǵabdýlova «Bilimdi arý», Natalıa Borzıkova «Ádebimen erekshelengen arý» atalymdary boıynsha marapattaldy.
Saltanatty shara barysynda BQO polıtsııa departamentiniń bastyǵy, polıtsııa general-maıory Maqsudhan Ablazımov jeńimpaz-nomınanttardy quttyqtady. Saıys júldegerlerine 100 myń, 75 myń jáne 50 myń teńge aqshalaı syılyq usynylsa, atalym ıegerlerine gúl shoqtary, dıplomdar men baǵaly syılyqtar tabys etildi.
Oǵan qosa jýyrda kúdiktini quryqtaýda ózi aıaǵy aýyr bola tura, eptilik pen qaısarlyq tanytqan Oral qalasy polıtsııa basqarmasy Shaǵan polıtsııa bóliminiń tergeýshisi, polıtsııa aǵa leıtenanty Sholpan Medenova (Serikova) QR ishki ister organdarynyń «Quqyq tártibin qamtamasyz etýde úzdik shyqqany úshin» tósbelgisimen marapattaldy.
Aıta keteıik, bıylǵy aqpan aıynda Sh.Medenova D.Qonaev atyndaǵy №6 shaǵynaýdannan №22 avtobýspen jumysyna kele jatqan kezde salonnan tergeý organdarynan jaltaryp júrgen QR QK 188-babyna sáıkes segiz adamnyń múlkin urlaýǵa qatysy bar kúdiktini baıqap qalady. Artynan ilesip otyryp, ony ustap, Shaǵan polıtsııa bóliminiń krımınaldyq polıtsııa qyzmetkerlerine tapsyrady. Qazirgi ýaqytta kúdikti qamaýǵa alynyp, tergeý amaldary júrgizilýde.
