Oralda «Aqjaıyq» shaǵynaýdanynyń turǵyndary sý aqysyn tóleı almaı otyr

ORAL. KAZINFORM — Oral qalasy Zachagan kenti «Aqjaıyq» shaǵynaýdany turǵyndarynyń sý aqysyn tóleı almaı otyrǵany jóninde áleýmettik jelide beınejazba jarııalandy.

Instagram áleýmettik jelisinde qala turǵyny Muhtar Ótesovtiń málim etkenindeı, 500-ge jýyq páter ıeleri osy shaǵynaýdanǵa qonystanǵanyna jarty jyl ótse de, bul másele sheshilmeı keledi.

Onyń sózine qaraǵanda, turǵyndar sýmen qamtıtyn «Batys sý arnasy» JShS-ǵa barsa, «Balansta joqsyzdar» dep aıtady. Oral qalasy turǵyn úı-kommýnaldyq sharýashylyq bólimi «Batys sý arnasyna» hat jiberdik deıdi. Ákimdik atalǵan bólimge silteıdi.

- Osylaı turǵyndar sergeldeńge túsip, ne isterin bilmeı júr, - deıdi M.Ótesov.

Osy máselege baılanysty Kazinform tilshisi Oral qalasy ákimdigine arnaıy saýal joldady.

Ákimdikten túsken málimetke qaraǵanda, «Batys sý arnasy» JShS «Aqjaıyq» shaǵynaýdanynda bıýdjet esebinen salynǵan kóppáterli turǵyn úılerge (№ 14, 17, 18, 19, 20) tekseris júrgizgen.

Atalǵan úılerde sý eseptegish quraldarynyń plombalanbaǵany, tehnıkalyq qujattamanyń usynylmaǵany jáne qurylys salýshylar tarapynan «Sýmen jabdyqtaý jáne sý burý júıelerindegi sýdy esepke alý erejeleri» men tehnıkalyq sharttardyń buzylǵany anyqtaldy. № 19 jáne № 20 úılerde jalpy úılik sý esepteý quraldary jumys istemeıdi.

- Atalǵan úıler ortalyqtandyrylǵan sý qubyryna qosylǵanymen, «Batys sý arnasynyń» teńgerimine qabyldanbaǵandyqtan, turǵyndar kórsetilgen qyzmet úshin aqy tólemeı otyr. Áleýmettik shıelenistiń aldyn alý maqsatynda Oral qalasynyń turǵyn úı-kommýnaldyq sharýashylyq bólimi tarapynan shyǵyndardy óteýge bıýdjettik ótinim berildi. Másele máslıhattyń kelesi sessııasynda qaralady. Qazirgi ýaqytta úılerdiń tapsyrys berýshilerine jáne merdiger uıymdarǵa anyqtalǵan eskertýlerdi joıý boıynsha tapsyrmalar berildi, - delingen resmı jaýapta.

«Aqjaıyq» shaǵynaýdany 17-úı 47-páterde turatyn Gúlzıra Mamytbaıqyzy sý eseptegish quraldarynyń plombalanbaǵanyn rastady.

- Biz osy jyldyń 22 naýryzynda páter kiltin alǵan edik. Qazir gaz ben elektr qýaty úshin eki-úsh aıdyń tólemaqysyn tólep tastadyq. Sýdyń tólemaqysy jınala-jınala kóbeıip kete me dep qorqamyz. Zachagan kentindegi «Jazıra» shaǵynaýdanyndaǵy «Batys sý arnasy» JShS-nyń bólimshesine barsam, «Baǵdarlamaǵa engizilgen joq», dedi. Taǵy bir telefon nómirine habarlassam, «Avtovokzal jaqtaǵy mekemeniń ózine aıaqtaı baryp, aryz jazyp ketińiz», deıdi. Qysqasy, birine-biri silteıdi, esh nátıje joq. Oǵan qosa birinshi qabattaǵy páterlerdiń edeni salqyn bolmaýy úshin jertóle jylý ustaǵysh materıalmen qaptalýy kerek. Kireberiste de osyndaı jumystar kezek kútip tur. Domofon da qajet, - dedi G.Mamytbaıqyzy.

Eske sala keteıik, budan buryn Oralda «Aqjaıyq» shaǵynaýdany qalaı salynyp jatqanyn jazǵan edik.