Oralda aqyn Zakarııa Sısenǵalıdyń jyr keshi ótti
Sharaǵa qatysqan oblys ákiminiń orynbasary Ǵabıdolla Ospanqulov aqyn keshiniń Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynyń jaryq kórgenine bir jyl tolýymen tuspa-tus kelip otyrǵanyn atap ótti. Osy merzimde «Rýhanı jańǵyrý» baǵdarlamasy aıasynda tek Batys Qazaqstan ǵana emes, elimizde, sondaı-aq shetelderde kóptegen jumystar atqaryldy.
«Qazaq halqy qashanda shyǵarmashylyq adamdaryn qurmetteı bilgen. Siz aqyndyq qarym-qabiletińizben birge Jańaqala aýdanynan taban aýdarmaı, memleketke, elge qyzmet etip kelesiz. Aýdan ákiminiń orynbasary retinde rýhanı salaǵa basshylyq ettińiz. Qazirgi kezde halyq qalaýlysy, aýdandyq máslıhat hatshysy retinde qarajat máseleleriniń ýaqtyly sheshilýine úles qosýdasyz», dedi Ǵ.Ospanqulov.
Keshte belgili aqyn, Qazaqstan Jazýshylar odaǵy BQO bólimshesiniń tóraıymy Aqushtap Baqtygereeva da Zakarııa Sısenǵalıdyń qalamgerlik qadyr-qasıetine toqtaldy.
«Rýhanı jańǵyrý árkimge de qatysty. Elimiz táýelsizdik alǵannan beri qazaq jastary álemniń túkpir-túkpirinde bilim alyp, eńbek etýde. Ózge eldiń adamdarymen terezesi teń, tórt qubylasy túgel. Ol da kerek. Degenmen týǵan jer degen qasıetti topyraq bar. Seniń atategiń, búkil bolmysyń sonda. Keıingi urpaqqa qaldyratyn mura, ósıetiń de sonda. Mine, osy turǵydan alǵanda, Zakarııa óleńderinen týǵan jerdi qurmetteýdiń úlgisin kóremiz. Basqasyn aıtpaǵanda, onyń sózine jazylǵan Donedil Qajymovtyń «Aq Jaıyq - arý mekenim» áni osy óńirdiń gımnine aınaldy. Bul án keń baıtaq qazaq elinde ǵana emes, shetelderde de oryndalyp júr. Bul - týǵan jerge degen perzent mahabbatynyń shynaıy kórinisi», dedi A.Baqtygereeva.
Sondaı-aq aqyn Saǵyntaı Bısenǵalıev lebizin jyrmen jetkizdi.
Keshte aqyn jańa óleńderin oqyp, onyń sózderine jazylǵan ánder shyrqaldy. 1974 jyly Z.Sısenǵalı túlep ushqan altyn uıa - Á.Jangeldın atyndaǵy orta mekteptiń muǵalimderi men shákirtteri, Jańaqala aýdanynyń ánshileri óz ónerlerin kórsetti.
