Oralda aqyn-ustaz Aqmarjan Taýbaevany eske alý keshi ótti
ORAL. QazAqparat - Qadyr Myrza Álı atyndaǵy mádenıet jáne óner ortalyǵynda aqyn-ustaz, QR Jýrnalıster odaǵynyń múshesi Aqmarjan Taýbaevanyń (1958-2016) shyǵarmashylyǵyna arnalǵan «Qulyn daýysty jyr-álem» atty eske alý keshi ótti, dep habarlaıdy «QazAqparat» tilshisi.
Eline adal qyzmet etken ustaz, aqyn, jýrnalısti eske alyp, esimin ulyqtaý, ónegeli ómir joly men shyǵarmashylyǵyn nasıhattaý, urpaqqa úlgi etý maqsatynda ótken keshte onyń ónerdegi jáne qyzmettegi áriptesteri sóz sóılep, ǵıbratqa toly estelikterimen bólisti. Ol ulaǵatty ustaz bolýmen birge baspasóz salasynda jemisti eńbek etti.
Shara barysynda aqyn, Qazaqstan Jazýshylar odaǵy BQO bólimshesiniń tóraıymy, halyqaralyq «Alash» ádebı syılyǵy men «Qurmet» ordeniniń ıegeri, Qazaqstannyń eńbek sińirgen qaıratkeri Aqushtap Baqtygereeva, pedagogıka ǵylymdarynyń doktory, professor, «Órleý» biliktilikti arttyrý ulttyq ortalyǵy» AQ fılıaly BQO boıynsha pedagogıkalyq qyzmetkerlerdiń biliktiligin arttyrý ınstıtýtynyń rektory Sofıa Іzmuhambetova jáne basqalar sóz alyp, Aqmarjan Baqytqyzynyń ómiri men óleńi, ustazdyǵy men jýrnalıstigi haqynda syr shertti.
Keshke aqynnyń uly Ánasyl men qyzy Ánarý, belgili kompozıtor Qaldybek Qurmanáli, Terekti aýdanynan arnaıy kelgen jerlesterimen birge óńirdegi zııaly qaýym ókilderi qatysty.
Aqynnyń óleńderi oqylyp, onyń sózderine jazylǵan ánder oryndaldy. Aq Jaıyq Aqmarjanyn osylaısha taǵy bir márte eske aldy.
Eske sala keteıik, «Men - Jaıyqtyń perzentimin» dep aqynnyń ózi jyrlaǵanyndaı, Aqmarjan Taýbaeva Aq Jaıyq jaǵasynda týyp-ósti. Uzaq jyl baspasóz salasynda jemisti eńbek etken ol keıingi jyldary «Órleý» BAUO» AQ BQO boıynsha fılıaly pedagogıkalyq qyzmetkerlerdiń biliktiligin arttyrý ınstıtýtynda «Jaıyq ustazy» gazetin shyǵaryp, onyń bas redaktory boldy. Jýrnalıstıkamen qatar qara sózdi qaýzap, óleń jazǵan Aqmarjannyń «Jaıyqtyń aq samaly» atty kitabyna belgili aqyn Ibragım Isa alǵysóz jazyp, qoldaý bildirgen edi. Sondaı-aq onyń bir top óleńderi kezinde «Soros - Qazaqstan» qory jarııalaǵan respýblıkalyq baıqaýdyń qorytyndysy boıynsha tańdaýlylar qatarynda arnaıy jınaqqa engizilgen bolatyn. Qazaqtyń partızan qyzy Nurǵanym Baıseıitova týraly qalam terbep, «Nur apasy Jaıyqtyń» atty kitap shyǵardy.
«Órleý» biliktilikti arttyrý ulttyq ortalyǵy» AQ fılıaly BQO boıynsha pedagogıkalyq qyzmetkerlerdiń biliktiligin arttyrý ınstıtýtynda ótken jyly aqyn Aqmarjan Taýbaeva atyndaǵy dárishana ashylǵan bolatyn. 
