Oralda aqyn Qaırat Jumaǵalıevke eskertkish taqta men aqparattyq pılon ornatyldy
Aqynnyń týǵan kúnine oraı eskertkish taqtanyń ashylý rásimine qatysqan Oral qalasynyń ákimi Mırjan Satqanovtyń atap ótkenindeı, ár eldiń, ár óńirdiń ulyqtaıtyn myqty tulǵalary bar. Sonyń biri – aqyn Qaırat Jumaǵalıev.
«Qaırat Jumaǵalıevtyń qazaq ádebıetindegi orny erekshe. Sonyń ishinde jastar men balalarǵa arnaǵan týyndylary mektep oqýlyqtaryna endi. Aqyn ómiriniń sońǵy jyldaryn Aq Jaıyqta ótkizip, óndire eńbek etip, «Jaryq dúnıe», «Kıe» atty kitaptaryn shyǵardy. Jastarmen jıi kezdesip, ǵıbrat alarlyq sózderin aıtty. Týǵan eliniń naq ortasynda bolyp, úlgi-ónegesin kórsetti. Sondyqtan aqyn esimin máńgi este qaldyrý baǵytyndaǵy is-sharalar budan keıin de jalǵasatyn bolady», dedi M.Satqanov.
Belgili aqyn, Memlekettik jáne halyqaralyq «Alash» syılyǵynyń laýreaty, «Otan», «Qurmet» ordenderiniń ıegeri, Qazaqstannyń eńbek sińirgen qaıratkeri Aqushtap Baqtygereeva qazirgideı qıly kezeńde rýhanııat jolynan aınymaı, Qaırat Jumaǵalıevtaı asyldarymyzdy ardaqtaı bilý kerektigin aıtty.
«Anasy bar adamdar eshqashan qartaımaıdy» dep, ana syılaýdyń úlgisin kórsetip, keıingi urpaqqa uran tastap, amanattap ketken Qaırat aqyndy qalaı qurmettese de, jarasady. Búgingi eskertkish taqta da tasqa basylǵan kitaptyń quny joǵary, aqyn sóziniń qudiretti ekendigin taǵy bir tanytyp tur. Bul tek Qaırat Jumaǵalıevke qoıylǵan belgi ǵana emes. Bul osydan jetpis jyl buryn Han ordasyn polıgon jasap, týǵan jerinen zorlap kóshirgen zulmat zamandy eske salyp turatyn bolady. Ordadan Shymkentke kóshken halyqtyń arasynan on balasyn kómip, elge qaıtyp kelgender boldy. Bul – sol náýbetti kózimen kórgen Qaıratqa degen eskertkish», dedi aqyn A.Baqtygereeva.
Q.Jumaǵalıevtiń qyzy Janar Qaıratqyzy is-sharany uıymdastyrýshylarǵa alǵysyn jetkizse, eńbek ardageri Lavr Haıretdınov aqynnyń 85 jyldyǵyna oraı áli de birqatar is-sharalardy júzege asyrý qajettigin jetkizdi.
«Bókeılikter» qoǵamdyq birlestigi Qaırat Jumaǵalıevti qurmet tutý baǵytynda jumystanyp keledi. Oral qalasynda Juban men Qadyrdyń eńseli eskertkishi bar. Qaırat aǵamyz qaıtqannan beri biraz ýaqyt ótti. Anasy Jańylǵanym ekeýine eskertkish ornatý jóninde bastama kóterilip, jobasy jasaldy. Mundaı jumystardy týǵan jeri – Bókeı ordasy aýdanynda da tyndyrýǵa bolar edi», dedi L.Haıretdınov.
Aıta keteıik, Qaırat Jumaǵalıev 1937 jyly 16 qyrkúıekte Bókeı ordasy aýdany Bısen aýyldyq okrýgine qarasty Besqudyq eldi mekeninde dúnıege keldi. 1952 jyly Orda aýdany taratylyp, jeri polıgonǵa berilgen kezde anasy Jańylǵanymmen birge Ońtústik Qazaqstan oblysyna kóshirildi. 1959 jyly QazMÝ-diń fılologııa fakýltetin bitirgennen keıin «Jazýshy» baspasynda eńbek etip, bas redaktordyń orynbasarlyǵyna deıin kóterildi. 1985-1992 jyldary Qazaq respýblıkalyq teledıdarynda aǵa redaktor, bas redaktor, 1993-1996 jyldary QR Parlamenti Senatynyń aýdarma-redaktsııalyq bóliminde sektor meńgerýshisi, keńesshi boldy, «Saryarqa» jýrnalynda da eńbek etti. 2009 jyly elge oralyp, 2013 jyly 17 jeltoqsanda kóz jumǵanǵa deıin «Jaıyq Press» JShS-da dırektordyń keńesshisi retinde qyzmet atqardy. Otyzǵa jýyq kitap jazǵan qalamger sońyna mol mura qaldyrdy.
