Oralda aqyn Ǵaısaǵalı Seıtaqtyń shyǵarmashylyq keshi ótti
ORAL. QazAqparat - Oralda Qazaqstan Jazýshylar odaǵynyń múshesi, T.Aıbergenov atyndaǵy syılyqtyń laýreaty, aqyn, jýrnalıst Ǵaısaǵalı Seıtaqtyń «Men - Narynnyń ulymyn» atty shyǵarmashylyq keshi ótti, dep habarlaıdy QazAqparat.
Qazaq ádebıetinde ózindik qoltańbasy bar aqyn bıyl 60 jasqa tolyp otyr. Ǵaısaǵalı Samıǵollauly - ózi dúnıege kelgen Bókeı ordasy aýdanynyń qurmetti azamaty. QR «Eren eńbegi úshin» memlekettik jáne «Qazaqstan táýelsizdigine - 10 jyl», «Astanaǵa - 10 jyl» merekelik medaldarynyń ıegeri.
Ol aýdandyq, oblystyq gazetterde tilshi, bólim meńgerýshisi, bas redaktordyń orynbasary, bas redaktor bolyp qyzmet etti. Qazir «Jaıyq Press» JShS bas dırektorynyń orynbasary. 2000 jyldan beri «QazAqparat» Halyqaralyq aqparat agenttiginiń BQO boıynsha menshikti tilshisi bolyp qyzmet etip keledi.
«Qarlyǵash», «Mańdaı», «Aman bol, atamekenim», «Narynnyń nar uldary», «Aı-arýdyń alqasy», «Tek pen tamyr», «Jaqynym meniń - jalpaq el» sekildi jyr jınaqtarynyń avtory.
Mereıtoı ıesin osy kúni oblys ákimi Altaı Kólginov qabyldap, mereıtoıymen quttyqtap, syı-qurmet kórsetti. Shyǵarmashylyǵy, ádebıet jáne óner salasy jaıly áńgime órbitti.
Sonymen qatar, H. Bókeeva atyndaǵy oblystyq qazaq drama teatrynda aqyn shyǵarmashylyǵyna arnalǵan kórme usynylyp, aqynnyń jańa «Qasıet qonǵan qara jer» atty kitabynyń tusaýkeseri ótti.
Shyǵarmashylyq keshke Almaty qalasynan Qazaqstan Jazýshylar odaǵy basqarmasy tóraǵasynyń orynbasary, Halyqaralyq «Alash» ádebı syılyǵy, «Baýyrjan Momyshuly atyndaǵy «Qyzyl Juldyz» ordeniniń ıegeri, Halyqaralyq «Shabyt» festıvaliniń laýreaty Baqyt Bedelhan, ǵalym, fılologııa ǵylymdarynyń doktory, professor, «Arys» qorynyń prezıdenti, respýblıkalyq «Arys» baspasynyń dırektory Ǵarıfolla Ánes, jazýshy-esseıst, ádebıettanýshy-ǵalym, fılologııa ǵylymdarynyń kandıdaty Maqsat Táj-Murat, «QazAqparat» halyqaralyq aqparat agenttigi bas dırektorynyń keńesshisi, jýrnalıst Qanat Mámetqazyuly arnaıy keldi. Olar mereıtoı ıesine ujymdar atynan iltıpat lebizderin bildirip, qazaq dəstúrine saı shapan japty.
«Alpys jas alpys emes, bul - alyp kúsh degen jas. Ǵaısaǵalı aǵa alyp kúshke kelip otyr. Atqa minetin shaqta tur. Alashqa qyzmet etetin aqyldyń altyn kenin qazyp jatqan shaqta Sizderdiń aldylaryńyzda esep berip otyr. Bir óleńinde «Men emes, minbege óleń shyqty» degen. Shynymen de, búgin sahnaǵa óleńdi shyǵardy. Ózi izettilik, kishipeıildilik tanytyp otyrǵan tabıǵaty qandaı, ózi qandaı, sózi qandaı, óleńi qandaı? Kishipeıildilik arqyly eldiń júregine órtteı janǵan óleńdi salyp, rýhyn kóterip otyrǵan aǵamyz myń jasasyn», - degen Baqyt Bedelhan Qazaqstan Jazýshylar odaǵynyń quttyqtaý hatyn tabystady.
Foto: zhaikpress.kz
