Oralda aqyn-dramatýrg Iran-Ǵaıyptyń respýblıkalyq teatrlar festıvali ótedi
ORAL. QazAqparat - El táýelsizdiginiń 25 jyldyǵyna oraı Batys Qazaqstan oblystyq qazaq drama teatrynda 22-27 qazan aralyǵynda belgili aqyn-dramatýrg, Memlekettik syılyqtyń laýreaty, halyqaralyq «Alash» jáne táýelsiz «Tarlan» syılyqtarynyń ıegeri Iran-Ǵaıyptyń (Iranbek Orazbaev) «Máńgilik eldiń altyn adamy» atty respýblıkalyq teatrlar festıvali ótedi.
Festıval shymyldyǵy, sonymen qatar batysqazaqstandyq teatrdyń HHІV maýsymy Iran-Ǵaıyptyń «Án-Muhıt» dramalyq dastanymen ashylady. Halyq kompozıtory, aqyn ári ánshi Muhıt Meráliulynyń 175 jyldyǵyna arnalǵan spektakldi QR eńbek sińirgen ártisi, «Qurmet» ordeniniń ıegeri Murat Ahmanov pen teatrdyń bas rejısseri Muqanǵalı Tomanov sahnalady. Muhıt rolinde teatrdyń beldi ártisteriniń biri ári ánshi, mádenıet salasynyń úzdigi Musaǵalı Bektenov oınaıdy.
Respýblıkalyq teatrlar festıvaline batysqazaqstandyq ujymnan basqa úsh teatr qatysady. Atap aıtqanda, Ǵ.Músirepov atyndaǵy Qazaq memlekettik akademııalyq balalar jáne jasóspirimder teatry oraldyqtardyń nazaryna Iran-Ǵaıyptyń «Ajdahanyń álegi» ertegisin (qoıýshy-rejısseri - QR eńbek sińirgen ártisi, «Qurmet» ordeniniń ıegeri Saǵyzbaı Qarabalın), «Fatıma» tragedııasy men «Estaıdyń Qorlany» mahabbatnamasyn (eki spektakldiń de rejısseri M.Ahmanov) usynbaqshy. Sol sekildi Shyǵys Qazaqstan oblysy Semeıdiń Abaı atyndaǵy memlekettik qazaq mýzykalyq drama teatry Iran-Ǵaıyptyń «Adasqan baq qusy» sher-shemenin (rejısseri Ersaıyn Tóleýbaı), Ońtústik Qazaqstan oblystyq orys drama teatry «Abylaı han» dramasyn (rejısseri - QR halyq ártisi ári eńbek sińirgen qaıratkeri, professor Erǵalı Orazymbetov) qoıady. Sondaı-aq Batys Qazaqstan oblystyq qazaq drama teatry «Án-Muhıtqa» qosa Iran-Ǵaıyptyń «Mahambet» tragedııasy men «Máńgilik eldiń altyn adamy» dramalyq dastanyn (M.Ahmanov), «Qorqyt» tragedııasyn (rejısseri - Sh.Aıtmatov atyndaǵy syılyqtyń laýreaty Qýandyq Qasymov), «Men ishpegen ý bar ma?» rekvıemin (M.Tomanov) sahnaǵa shyǵarmaq.
«Jeke avtordyń týyndylaryna arnalǵan óner dodasy BQO ákimdigi men oblystyq mádenıet, muraǵattar jáne qujattama basqarmasynyń qoldaýymen Batys Qazaqstanda alǵash ret uıymdastyrylyp otyr. Festıvalge Makedonııadan, Máskeý men elimizdiń qalalarynan teatr mamandary, aqyndar, dramatýrgter keledi. Olar festıval barysynda teatr ónerin damytý baǵytynda tájirıbe almasyp, óz oı-pikirlerimen bólisetin bolady», dedi teatr dırektory Qýanysh Amandyqov.
