Oralda aqtóbelik sýretshilerdiń kórmesi ashyldy
ORAL. QazAqparat - Qadyr Myrza Álı atyndaǵy mádenıet jáne óner ortalyǵynda Aqtóbe oblystyq óner mýzeıi men osy óńir sýretshileriniń mýzeıi ashyldy, dep habarlaıdy «QazAqparat» HAA tilshisi.
Kórshiles oblyspen shyǵarmashylyq baılanysty nyǵaıtý, qala turǵyndaryn beıneleý óneri, fotoóner jáne qolóner týyndylarymen keńinen tanystyrý maqsatynda uıymdastyrylǵan kórmeniń ashylý rásiminde BQO mádenıet, muraǵattar jáne qujattama basqarmasynyń basshysy Dáýletkereı Qusaıynov aqtóbelik qylqalam sheberleriniń qadamyna sáttilik tiledi. Sondaı-aq Aqtóbeden kelgen sýretshi, músinshiler, QR Sýretshiler odaǵynyń músheleri, Aqtóbe oblystyq óner mýzeıiniń dırektory Marat Ǵabdrahmanov, Aıdar Espaev, Jeńis Jubanqosov uıymdastyrýshylarǵa rızashylyǵyn bildirdi. Qazaqstan Sýretshiler odaǵy BQO fılıalynyń tóraǵasy Qaıyr Orazǵalıev te eki oblys arasynda óner salasyndaǵy tıimdi qarym-qatynastyń óristeýine tilektes ekendigin jetkizdi.
Kórmege aqtóbelik jıyrma sýretshiniń keskindeme, grafıka, sándik-qoldanbaly óner baǵytyndaǵy elýden asa eńbegi qoıylǵan. Onda Aqtóbe óńiriniń eli men jeri, tarıhy men tabıǵaty, salt-dástúri, qarapaıym eńbek adamdarynyń tynys-tirshiligi kórinis tapqan.
Qadyr ortalyǵynyń rejısseri Sandýǵash Qaıyrǵalıevanyń aıtýynsha, kórme bir aı boıy turmaq. Ótken jyly ortalyq QR Táýelsizdiginiń 25 jyldyǵyna oraı barlyq aýdan sýretshileriniń «Táýelsizdikke tartý» kórmesin uıymdastyryp, jeltoqsan aıynda qorytyndylaǵan bolatyn. Bıyl Qazaqstan Sýretshiler odaǵy BQO fılıalymen birlese otyryp, kórshiles oblystarmen baılanys ornatylýda. Aqtóbeden keıin atyraýlyq sýretshilerge kezek kelmek.
