Oralda Aqmola oblystyq qazaq mýzykalyq drama teatrynyń gastroli ótýde
ORAL. QazAqparat - Oralda Shahmet Qusaıynov atyndaǵy Aqmola oblystyq qazaq mýzykalyq drama teatrynyń gastroli ótýde, dep habarlaıdy QazAqparat tilshisi.
Gastrol juma kúni keshkisin H.Bókeeva atyndaǵy Batys Qazaqstan oblystyq qazaq drama teatrynda tatar dramatýrgi Sharıf Qusaıynovtyń «Anamnyń aq kóılegi» atty dramasymen bastaldy.
Trýppany (40 adam) bastap kelgen teatrdyń kórkemdik jetekshisi, akter, QR mádenıet qaıratkeri Tóleýbek Qonbaıdyń aıtýynsha, «Anamnyń aq kóılegi» Qazaqstannyń halyq ártisi Jibek Baǵysovanyń 70 jasqa tolýyna oraı sahnalanǵan bolatyn. Onyń qoıyla bastaǵanyna 5-6 jyl boldy.
Spektakl kenje balanyń kelin alyp kelýimen, kóńildi bastalǵanymen, oqıǵa shıelenisip, shıryǵa túsedi. Aýyr dertke shaldyqqan anany uldarynyń eshqaısysy baqqysy kelmeıdi. Tek kenjesi páter jaldap tursa da, anasynan aırylǵysy joq. Jańadan túsken kelin de ketip qalady. Kórermenderdiń kózine jas úıirgen týyndy bala úshin otqa da, sýǵa da túsetin ananyń qadir-qasıetin uqtyra túsedi.
Óner sapary senbi kúni ózbek dramatýrgi Izzat Sultanovtyń «Otbasylyq qupııa», sodan keıin Saıa Qasymbektiń «Bala kimdiki?!» komedııasymen jalǵasyp, 23 sáýirde Ýılıam Shekspırdiń «Romeo men Djýletta» tragedııasymen qorytyndylanady. Oǵan qosa balalarǵa arnalǵan «Naýryz kóje» qoıylymy da bar.
Aq Jaıyq jurtshylyǵy J.Baǵysovamen qatar mádenıet qaıratkerleri Qaırat Myrzabolatov, Janar Satybaıqyzy, Qumarbek Qalqataev, Aına Júnisova jáne basqa beldi ártisterdiń ónerin tamashalaı alady.
«Bizdiń teatrymyzdyń otaý tikkenine 22 jyl boldy. 1996 jyly Ǵabıt Músirepovtiń «Aqan seri - Aqtoqty» shyǵarmasymen teatr shymyldyǵy ashylǵan edi. Sodan beri biraz jerge baryp, elimizdiń ońtústigine de, shyǵysyna da jol túsken. Al Batys Qazaqstanǵa alǵash ret aıaq basyp otyrmyz. «Otbasylyq qupııa» komedııasynyń qoıylǵanyna bir-aq jyl boldy. Osy 21-maýsym shymyldyǵyn «Bala kimdiki?!» spektaklimen ashsaq, «Romeo men Djýletta» tragedııasynyń premerasy 15 sáýirde Kókshetaýda boldy. Endi, mine, Oralda ekinshi ret qoıǵaly otyrmyz», dedi «QazAqparat» tilshisine Tóleýbek Qonbaı.
Aıta keteıik, 8-13 mamyr aralyǵynda Oralda «Rýhanı jańǵyrý» baǵdarlamasy aıasynda M.Áýezov atyndaǵy Qazaq memlekettik akademııalyq drama teatrynyń gastroli de bolmaqshy.
