Oralda aqyn Ǵumar Qarashtyń 150 jyldyǵyna arnalǵan jyr músháırasy máresine jetti
ORAL. KAZINFORM – Qadyr Myrza Áli atyndaǵy oblystyq mádenıet jáne óner ortalyǵynda qazaqtyń kórnekti aqyny, oıshyl, fılosof Ǵumar Qarashtyń 150 jyldyǵyna arnalǵan «Asyldyǵyn alty alashqa bilgizgen» atty oblystyq jas aqyndar músháırasy ótti.
Mereıtoılyq is-sharanyń basty maqsaty – Ǵumar Qarashtyń 150 jyldyǵyna oraı aqyn muralaryn keńinen nasıhattaý, tarıhı sanany qalyptastyrý, otansúıgishtik rýhty kóterý jáne tarıhtan taǵylym alý.
Jánibek aýdany ákimdigi Qazaqstan Jazýshylar odaǵy BQO-daǵy ókildigimen birlesip uıymdastyrǵan jyr baıqaýyna barlyǵy 10 jas aqyn qatysyp, baq synady. Músháıraǵa Jánibek aýdanynyń týmasy, Aqmola oblysy Bulandy aýdandyq máslıhatynyń depýtaty Álisher Kenjeǵalıev demeýshilik jasady.
Qazylar alqasynyń uıǵarymymen Batys Qazaqstan oblystyq «Oral óńiri» gazetiniń tilshisi Janerke Ǵınaıat birinshi orynǵa ıe boldy. Júldeli ekinshi oryndy Meńdibek Luqpanov, al úshinshi oryndy Nurym Ǵumar men Azamat Baqıev ıelendi. Qalǵan alty aqyn da qur qol ketpeı, yntalandyrý syılyqtaryn aldy.
– Ǵumar Qarash – Alash jurtyn aǵartýshylyqqa úndep, ilim-bilimge jol siltegen ǵulama babamyz. Músháıra jarııalanǵany týraly gazetten oqyǵannan keıin baq synap kórdim. Birinshi oryn alǵanyma qýanyshtymyn. Bul – birinshi músháıram emes. Aldaǵy ýaqytta qalamymdy qoldan túsirmeı, jýrnalıstik jolda da shyńdala bergim keledi, - dedi Janerke Ǵınaıat.
Jánibek aýdany ákiminiń orynbasary Jannur Ahmetov músháıra aqyn, oıshyl ǵulama Ǵumar Qarashtyń 150 jyldyǵyna oraı bıyl josparlanǵan is-sharalardyń biri ekenin jetkizdi.
– Jas aqyndardyń, óskeleń urpaqtyń ǵumartanýǵa bet burýy úshin mundaı baıqaýlardyń mańyzy zor. Óshkenimizdi jandyryp, ótkenimizdi túgendeý maqsatynda bıylǵy sáýir aıynda kóptegen is-sharany oılastyryp edik. Sonyń biri – jas aqyndardyń jyr músháırasy máresine jetip, kóńil birlendi. Ǵumar Qarash týraly jerles qalamger Nurlan Sádir jazǵan pesa Hadısha Bókeeva atyndaǵy oblystyq qazaq drama teatryna tapsyryldy. Ony bas rejısser Almat Sháripov jyl sońyna deıin sahnalap, oblystyq mádenıet basqarmasynyń qoldaýymen kórermenderge usynady. Sondaı-aq «Habar» arnasy derekti fılm túsirse, Astana qalasynda ǵumartanýshy, ólketanýshy Jantas Safýllın shyǵarǵan Ǵumar Qarash shyǵarmalarynyń úsh tomdyǵynyń tanystyrylymy bolady. Oǵan qosa Oral qalasynda respýblıkalyq ǵylymı-tájirıbelik konferentsııa ótedi. Mereıtoı Jánibek aýdanynda respýblıkalyq aqyndar aıtysy jáne dala qyzyqtarymen qorytyndylanady, - dedi J.Ahmetov.
Qazylar alqasynyń tóraǵasy, belgili qalamger, Qazaqstan Jazýshylar odaǵynyń BQO-daǵy ókili, oblystyq «Oral óńiri» gazetiniń bas redaktory Baýyrjan Ǵubaıdýllın biregeı talanttardyń taǵdyry súrgilengen taqtaıdaı tegis bola bermeıtinine, kópshiliginiń ómir joly túrli qıyndyqqa toly ekenine nazar aýdardy.
– Dúnıeden ótkennen keıin de Ǵumar Qarashtyń taǵdyry, rýhanı murasynyń joly óte aýyr boldy. Keńes ókimeti kezinde atyn ataýǵa, óleńderin oqýǵa, shyǵarmashylyǵyn nasıhattaýǵa tyıym salyndy. Ál-Farabı atyndaǵy Qazaq ulttyq ýnıversıtetinde oqyǵan kezimizde bizge belgili ǵalym, fılologııa ǵylymynyń doktory Zeınol-Ǵabden Bısenǵalı qazirgi zamanǵy qazaq ádebıetinen dáris berdi. Ol kisiniń aıtýynsha, ótken ǵasyrdyń otyzynshy jyldarynyń shamasynda, saıası qýǵyn-súrgin bastalmaı turǵan kezde qazaq zııalylarynyń arasynda «Qazaqtyń bas aqyny dep kimdi tanımyz, Abaıdy ma, Ǵumar Qarashty ma?» degen qyzý pikirtalas bolǵan. Osy bir aýyz sózden-aq Ǵumar Qarashtyń ıntellektýaldy tulǵa ekenin, qazaq ádebıetindegi ornynyń qanshalyqty joǵary turǵanyn baǵamdaı berýge bolady, - dedi B.Ǵubaıdýllın.
Jas aqyndardyń óleńderin sondaı-aq Dáýletkereı Qusaıynov, Qazybek Quttymuratuly, Nurtaı Tekebaev syndy aqyn-jýrnalıster tarazylap, baǵasyn berdi.
Ýaqyttyń tyǵyzdyǵyna baılanysty jastardyń Ǵumar Qarash shyǵarmashylyǵyna tereńdeı almaǵany, aqyn murasynyń ǵalymdardyń zertteý nysanasyna aınalýy kerektigi aıtyldy. Óıtkeni alty Alashtyń azattyǵy úshin kúresip, sol jolda qaza tapqan qaıratker aqynnyń óleńderi men týyndylaryn nasıhattaý jaǵy áli de kemshin túsip tur. Bul baǵytta qyrýar is tyndyrý búgingi urpaqtyń enshisinde.
Eske sala keteıik, budan buryn Batys Qazaqstanda 6 bilim ǵımaraty paıdalanýǵa beriletinin jazǵan edik.