Oralda ákimniń kýbogy úshin voleıboldan jarys ótti
ORAL. QazAqparat - Oralda Táýelsizdik kúnine oraı voleıboldan BQO ákiminiń kýbogy úshin voleıboldan jarys márege jetti, dep habarlaıdy «QazAqparat» tilshisi.
Oblystyq, qalalyq jáne aýdandyq ákimdik qyzmetkerleri arasynda úsh kúnge sozylyp, tartysty ótken týrnırge barlyǵy 14 komanda qatysyp, baq synady.
Fınaldyq básekede shyńǵyrlaýlyq áriptesterin utqan Qaztalov aýdany ákimdigi komandasy jeńimpaz atandy. Sondaı-aq aqjaıyqtyqtar úshinshi, jánibektikter tórtinshi orynǵa ıe boldy.
Sonymen qatar erekshe kózge túsken oıynshylar da marapattaldy. Atap aıtqanda, Bókeı ordasy aýdany ákimdiginen Mereke Bısembaev «Úzdik qorǵaýshy», jánibektik Tahır Qadımov «Úzdik baılanystyrýshy», aqjaıyqtyq Tımýr Shynııazov «Úzdik shabýylshy», shyńǵyrlaýlyq Tilepbergen Qaıýpov «Úzdik oıynshy», zelenovtyq Aleksandr Shatalov pen BQO ákimdiginen Qazbek Meńeev «Týrnır aqsaqaly» atandy.
Aıta keteıik, memlekettik qyzmetshiler arasynda salaýatty ómir saltyn ornyqtyrý, olardyń sportpen aınalysýy úshin yntalandyrý maqsatynda mundaı jarystar dástúrli túrde uıymdastyrylyp keledi.
