Oralda ákesin óltirgen turǵyn 10 jylǵa sottaldy
ORAL. QazAqparat – Batys Qazaqstan oblysynyń Qylmystyq ister jónindegi mamandandyrylǵan aýdanaralyq sotynda D.Meńdiǵalıevke qatysty úkim shyqty, dep habarlaıdy QazAqparat tilshisi.
Atalǵan sottan túsken málimetke qaraǵanda, is beınebaılanys júıesi jáne TrueConf baǵdarlamasy arqyly qaraldy.
Buryn sottalmaǵan D.Meńdiǵalıev QR QK 99-baby 1-bóligine (adam óltirý) sáıkes aıypty dep tanylyp, 10 jylǵa bas bostandyǵynan aıyrý jazasyn qaýipsizdigi barynsha joǵary qylmystyq-atqarý júıesi mekemesinde óteýge sottaldy.
Sot tergeýinde D.Meńdiǵalıev aıybyn moıyndap, shyn ókinetinin bildirdi jáne onyń kinási tolyq dáleldendi.
Sot talqysynda anyqtalǵanyndaı, D.Meńdiǵalıev bıyl 10 aqpanda keshke jezdesimen birge ákesi turatyn páterge kelip, úsheýi araq ishken. Bir shólmek túgesilgennen keıin jezdesi úıine ketip, ákeli-balaly ekeýi araq ishýin jalǵastyrǵan.
Saǵat 21.30 shamasynda masaıý saldarynan ekeýiniń arasynda kelispeýshilik týyndap, ákesi «Óltir meni» dep, eki pyshaqty balasyna qaraı laqtyryp jibergen. Uly ákesine «Men seni óltirip, sottalǵym kelmeıdi» dep jaýap bergen. Biraq ákesi qolyna qalam alyp, bloknotqa «Bárine ózim kinálimin, bala kiná...» degen sózderdi jaza bastaǵanda, uly M.Meńdiǵalıevtiń keýdesine úsh ret pyshaq salǵan. Er adam sol jerde kóz jumǵan.
Sot úkimi kúshine engen joq.
