Oralda «Aq Jaıyq - arý mekenim» án festıvali márege jetti
ORAL. QazAqparat - Búgin ánshi-kompozıtor Donedil Qajymovtyń ánderin oryndaýshylardyń ІІ respýblıkalyq «Aq Jaıyq - arý mekenim» án festıvali márege jetti, dep habarlaıdy «QazAqparat» tilshisi.
Elge ánshiligimen jáne kompozıtorlyq qyrymen keńinen tanylǵan Qazaqstannyń eńbek sińirgen qaıratkeri, «Qurmet» ordeniniń ıegeri, Qazaqstan Kompozıtorlar odaǵynyń múshesi Donedil Qajymovtyń shyǵarmashylyǵyn nasıhattaý maqsatynda óner dodasyn Ǵ.Qurmanǵalıev atyndaǵy oblystyq fılarmonııa BQO ákimdigi, oblystyq mádenıet, arhıvter jáne qujattama basqarmasynyń qoldaýymen osymen ekinshi ret uıymdastyrdy. 
Eki kúnge sozylǵan án saıysyna Astana, Almaty, Oral qalalary men Ońtústik Qazaqstan, Batys Qazaqstan oblystarynan barlyǵy 20 úmitker qatysyp, baq synady.
Baıqaýǵa qazylar alqasynyń tóraǵasy, Qazaqstannyń halyq ártisi, elimizge tanymal ánshi Nurǵalı Núsipjanov, sondaı-aq Bishkek qalasynan arnaıy kelgen aqyn, Alykúl Osmonov jáne Moldo Nııaz atyndaǵy respýblıkalyq, Jalaladdın Rýmı atyndaǵy halyq-aralyq ádebı syılyqtar¬dyń ıegeri Atantaı Akbarov, ánshi, Toqtoǵul Satylǵanov atyndaǵy Qyrǵyzstan fılarmonııasynyń solısi Oktom Kalyeva, ánshi-kompozıtor, Qazaqstannyń eńbek sińirgen ártisi Gúlnár Dáýkenova jáne basqa óner maıtalmandary tórelik etti.
Saıys barysynda Donedil Qajymovtyń otyzdan astam ánderi oryndaldy.
Festıval qorytyndysynda bas júldeni Terekti aýdanynan kelgen «Úsh qońyr» trıosy (Tańat Jeksenbaev, Dáýren Jumaǵalıev, Asylanbek Shaıhın) jeńip aldy. Syrymdyq Bekeı Qanatov birinshi, oraldyq Mádı Sabyrov pen shymkenttik Óserbaı Bórihanov ekinshi, jánibektik Raıymbek Kárimov, oraldyqtar Aıym Shekeeva men Erkebulan Qaıyrǵalıev úshinshi orynǵa ıe boldy. Aqsaılyq Ásel Qudjanova, tasqalalyq Úmit Ótebálıeva, jańaqalalyq Qýanyshbek Aıdarbekov, oraldyq Nazgúl Pahman dıplomant atandy.
«Donedil Qajymovtyń ánderi naǵyz qazaqy rýhqa saı keletin týyndylar ekendigi kópke málim. Batys Qazaqstannyń ánuranyna aınalǵan «Aq Jaıyq - arý mekenim» syndy ánderdi respýblıka óńirleri ǵana emes, shetelderde de súıip oryndaıdy. Týǵan jerdi, Otanymyzdy dáripteıtin mundaı ánder «Rýhanı jańǵyrý» baǵdarlamasyna tolyq saı keledi. Sondyqtan festıvaldi bolashaqta halyqaralyq deńgeıde ótkizý kózdelýde. Osy joly Aq Jaıyqqa Nurǵalı Núsipjanovtyń da kelip, Dáýletkereı atyndaǵy ult aspaptar orkestriniń súıemeldeýimen án shyrqaýy halyqty bir kóterip tastady», dedi «QazAqparat» tilshisine qazylar alqasynyń múshesi, kompozıtor, Dáýletkereı atyndaǵy orkestrdiń kórkemdik jetekshisi jáne bas dırıjeri Erkin Nurymbetov.
