Oralda aq kombınezonmen tumshalanǵan er adam mıkroqarjy uıymyn tonady

ORAL. QazAqparat – Oral qalasynyń 39 jastaǵy turǵyny halyqqa aqshalaı qaryz beretin mıkroqarjy uıymdarynyń birin tonap ketken, dep habarlaıdy QazAqparat tilshisi.

BQO Polıtsııa departamentiniń baspasóz qyzmetinen málim etkenindeı, oqıǵa 1 maýsym kúni boldy.

Oral qalasynda ornalasqan mıkroqarjy uıymdarynyń biriniń kassıri Polıtsııa departamentiniń kezekshi bólimine qońyraý shalyp, saǵat 15.36-da ústine aq kombınezon kıgen belgisiz er adamnyń keńsege basa-kóktep kirgenin habarlady. Ol kassırdi tapansha tárizdi zatpen qorqytyp, kassada bar aqshany berýdi talap etken. Kassır qoryqqanynan aqshany bergen. Sodan keıin shabýyl jasaǵan adam oqıǵa ornynan boı tasalaǵan. Jedel izdestirý is-sharalary nátıjesinde BQO Polıtsııa departamentiniń qyzmetkerleri 1984 jyly týǵan kúdiktini anyqtap, qolǵa túsirdi. Atalǵan derek boıynsha QR Qylmystyq kodeksiniń 192-baby 1-bóligine (qaraqshylyq) sáıkes sotqa deıingi tergeý amaldary júrgizilýde. Bul bap boıynsha aıypty dep tanylǵan adam múlki tárkilenip, úsh jyldan jeti jylǵa deıin merzimge bas bostandyǵynan aıyrýǵa jazalanady. Ustalǵan adam Oral qalasy polıtsııa basqarmasy ýaqytsha ustaý ızolıaotoryna qamaýǵa alyndy

, dep habarlady vedomstvodan.

Polıtsııa departamentiniń málimetine qaraǵanda, mán-jaılardy anyqtaý barysynda 39 jastaǵy kúdikti buryn qylmystyq jaýapkershilikke tartylmaǵan bolyp shyqty. Ol kassırdi oıynshyq tapanshamen qorqytqan. Aıtýynsha, ol bul qylmysqa qaryzdarynan qutylý úshin barǵan.

Batys Qazaqstan oblysynda osymen jyl basynan beri úsh qaraqshylyq shabýyl tirkeldi. Qylmystardyń úsheýi de ashyldy.