Oralda «Aq kógershin» respýblıkalyq baıqaýy márege jetti
ORAL. QazAqparat - Oraldaǵy Jastar mádenıet úıinde XV respýblıkalyq «Aq kógershin» balalar shyǵarmashylyǵy festıval-baıqaýy márege jetti, dep habarlaıdy «QazAqparat» HAA tilshisi.
«Aq kógershin» balalar qory jas jetkinshekterdiń ónerdegi qarym-qabiletin jetildirý, ulttyq mádenıetke baýlý, jańa esimderdi ashý maqsatynda jyl saıyn uıymdastyratyn dástúrli dodaǵa Qazaqstannyń batys óńirinen 5-17 jas aralyǵyndaǵy barlyǵy 850-deı úmitker qatysty. Olar vokal, halyqtyq aspapta oryndaý, bı, sán óneri, kórkemsóz oqý syndy atalymdar boıynsha synǵa tústi.
Festıval qorytyndysynda aspapta oryndaýdan Oraldaǵy D.Nurpeıisova atyndaǵy №1 balalar mýzyka mektebiniń skrıpka ansambli, sondaı-aq osy bilim ordasynan Polına Neznanova (dombyra), Zelenov aýdany Peremetnyı aýylynan Aıdos Serikov (fortepıano), daryndy balalarǵa arnalǵan mamandandyrylǵan S.Seıfýllın atyndaǵy №11 oblystyq mektep-ınternaty kesheninen Raýshan Ǵımran (qobyz), oraldyq Baıdáýlet Súndetqalı (skrıpka) bas júldeni jeńip aldy. Kórkemsóz oqýdan Aqjaıyq aýdany Esensaı aýylynan kelgen Nurdáýlet Maǵytaı aldyna jan salmasa, «Halyqtyq oryndaýda» S.Seıfýllın atyndaǵy №11 mektep-ınternat kesheniniń «Atamura» úlgili halyq aspaptar orkestri ozdy. Bıden kishi toptaǵylar arasynan Aqtóbe oblysy Hromtaý qalasynan kelgen «Altyn dán» ansambli, sondaı-aq Oraldaǵy A.Baıtursynov atyndaǵy №10 mekteptiń «Aınaz» (orta top) bı ansambli jeńimpaz atandy. Án salýdan Oraldaǵy №7 mektep shákirti Sabına Ismaılova ozdy. Sol sekildi dástúrli án oryndaýdan oraldyq Armat Ádilov pen jańaqalalyq Sıhvatolla Eshkaev úzdik shyqty.
Baıqaý jeńimpazdary Astana qalasynda naýryz aıynda ótetin «Aq kógershinniń» halyqaralyq kezeńine qatysatyn bolady.
