Oralda adasyp ketken zeınetkerler qutqaryldy
ORAL. QazAqparat - Keshe saǵat 19.14-te 1952 jylǵy er jáne 1958 jylǵy áıel adamnyń saǵat 12.00-de Perevalochnaıa ormanyna baryp, adasyp ketkeni jóninde málimet túsken, dep habarlaıdy «QazAqparat» tilshisi.
BQO TJ departamentiniń baspasóz hatshysy Nurgúl Muqanovanyń aıtýynsha, abyroı bolǵanda, zeınetkerlerdiń uıaly telefondary qosýly eken. Departamenttiń biryńǵaı kezekshi-dıspetcherlik qyzmeti basqarmasynyń qyzmetkerleri tildesken kezde olardyń sańyraýqulaq terip júrip, baǵyttarynan aıyrylyp qalǵany belgili boldy. Jedel kezekshi, azamattyq qorǵaý kapıtany Azamat Nurpeıisov saýal qoıa otyryp, zeınetkerlerdiń qaıda júrgenin shamamen anyqtap, olardy Jaıyq ózeniniń jaǵalaýyna qaraı baǵyttady.
Adasqandardy izdeýge jedel qutqarý jasaǵynan eki brıgada shyǵyp, olardyń bireýi jaǵalaýda izdestirý jumystaryn júrgizse, ekinshisi motorly qaıyqpen ózenge tústi. Saǵat 21.30-da zeınetkerler Jaıyq ózeni jaǵalaýynan 2,5 km jerdegi orman ishinen, 1-saıajaı qaýymdastyǵy aýdanynan tabyldy. Olardyń ekeýiniń de deni saý, medıtsınalyq kómekke júgingen joq.
