Oralda adamdar jappaı ýlanǵan dámhana ıesi raqymshylyqqa ilikti
ORAL. QazAqparat - Oral qalalyq sotynyń 6 naýryzdaǵy úkimimen Nurman Qabekeshev QR QK 304-baby 1-bólimine (sanıtarlyq erejelerdiń nemese gıgıenalyq talaptardyń buzylýy) sáıkes aıypty dep tanylyp, oǵan bas bostandyǵyn 1 jylǵa shekteý jazasy taǵaıyndaldy, dep habarlaıdy «QazAqparat» HAA tilshisi.
Oral qalalyq sotynan túsken málimetke qaraǵanda, ol sonymen qatar tamaq ónimi óndirisi salasynda úsh jyl merzimge kásipkerlik qyzmetpen aınalysý quqyǵynan aıyryldy. «Qazaqstan Respýblıkasy táýelsizdiginiń jıyrma bes jyldyǵyna baılanysty raqymshylyq týraly» QR Zańy 2-baby 1-bólimine sáıkes onsha aýyr emes qylmys jasaǵandar jazadan bosatylady. Sol sebepti N.Qabekeshev negizgi jazadan qutyldy.
Sot talqysynda belgili bolǵanyndaı, «Qabekeshev N.S.» jeke kásipkerligi jalǵa alǵan dámhanada tez daıyndalatyn taǵamdardy satqan. Alaıda taǵamdy sanıtarlyq kitapshasy joq adamdar ony ázirleý jáne saqtaý talaptaryn buza otyryp, daıyndaǵan. Sanıtarlyq jáne gıgıenalyq talaptardyń buzylýy saldarynan ótken jylǵy 9-11 qarasha aralyǵynda tamaqtan ýlanǵan 29 adam ótkir gastroentrokolıt dıagnozymen oblystyq juqpaly aýrýlar aýrýhanasyna jatqyzylǵan bolatyn.
Basty sot talqysynda sottalýshy óz kinásin tolyqtaı moıyndady.
Eske sala keteıik, 9-11 qarasha kúnderi D.Qonaev atyndaǵy shaǵynaýdandaǵy «M6» saýda úıinde ornalasqan «Býrger strıt+» kafesindegi tez daıyndalatyn býrgerlermen tamaqtanǵan barlyǵy 33 adam dárigerler qyzmetine júginip, sonyń 29-y oblystyq juqpaly aýrýlar aýrýhanasyna jatqyzylǵan bolatyn. Osynyń jeteýi bala bolsa, bireýi tórt jasqa tolmaǵan baldyrǵan edi. Keıin adamdardyń salmonellez aýrýyn juqtyrǵany málim boldy. BQO tutynýshylar quqyǵyn qorǵaý departamenti anyqtaǵanyndaı, atalmysh nysandy adamdardyń jappaı ýlanýynan keıin teksergen kezde kóptegen zańbuzýshylyqtardyń beti ashyldy.
Ashanada jumys jasaıtyndar negizinen jastar bolyp shyqty, olardyń aspaz retindegi biliktiligi joq. Oǵan qosa barlyǵynda sanıtarlyq kitapsha men jumysqa ruqsat qaǵazy bolmady. Aqyry juqpaly aýrýdyń aspazdan taralǵany belgili boldy.
