Oralda adam óltirip, múrdesin ájethana shuńqyryna laqtyryp tastaǵan turǵyn sottaldy
ORAL. QazAqparat – Oralda adam óltirip, múrdesin ájethana shuńqyryna laqtyryp tastaǵan M.Ájibaev 14 jylǵa sottaldy, dep habarlaıdy QazAqparat tilshisi.
BQO qylmystyq ister jónindegi mamandandyrylǵan aýdanaralyq sotynan túsken málimetke qaraǵanda, is «TrueConf» mobıldik beınebaınalys júıesi arqyly qaraldy.
Sot talqysynda málim bolǵanyndaı, oqıǵa ótken jyly 2 qarasha kúni keshkisin oryn aldy.
Saǵat 20.30 shamasynda M.Ájibaev Á.Kerderi kóshesi 79-úıdiń janynan E.Qusanovany ózine beıtanys A.Jolaevtyń qasynan kórip, qyzǵanǵan. Sodan keıin E.Qusanovany atalǵan úıdiń aýlasyna súırep kirgizip jiberip, A.Jolaevty aıaq-qolymen uryp-soqqan.
A.Jolaev qashyp qutylmaq bolyp, úıdiń aýlasyna kirgen mezgilde pyshaqpen sol jaq ıyǵyna kóptegen soqqy jasaǵan. A.Jolaev ıyq qan tamyrynan alǵan aýyr jaraqat saldarynan sol jerde jan tapsyrǵan.
M.Ájibaev A.Jolaevtyń ólgenine kóz jetkizip, quny 100 myń teńge turatyn «Samsung Galaxy J2 Prime Duos» uıaly telefonyn jymqyryp ketken. Sosyn qylmystyń izin jasyrý maqsatymen marqumnyń múrdesin ájethana shuńqyryna laqtyryp tastaǵan.
Sýdıa Shara Zaınýllınanyń aıtýynsha, M.Ájibaev óz aıybyn tolyq moıyndamaǵanyna qaramastan, onyń kinási sotta dáleldendi.
Sottalýshy QR QK 99-baby 1-bóligine (adam óltirý) jáne 188-baby 1-bóligine (urlyq) sáıkes aıypty dep tanyldy.
Sot jaza taǵaıyndaǵan kezde qylmystyń sıpaty men qoǵamǵa qaýiptiligin, sottalýshynyń jeke basy men aýyrlatatyn mán-jaılardy eskerdi.
QR QK 99-baby 1-bóligine sáıkes 8 jyldan 15 jylǵa deıin jaza kózdelgen. QR QK 58-baby 3-bóligine sáıkes jazany ishinara qosý arqyly M.Ájibaev túpkilikti 14 jylǵa bas bostandyǵynan aıyryldy. QR QK 14-baby 2-bóligi 2-tarmaǵynda kózdelgenindeı, M.Ájibaevtyń is-áreketinde qaýipti retsıdıv tanylǵandyqtan, jazasyn tótenshe jaǵdaıdaǵy qylmystyq-atqarý júıesi mekemesinde óteý belgilendi.
Sot úkimi kúshine engen joq.
