Oralda A.Pýshkınniń týǵan kúni atalyp ótildi
ORAL. 6 maýsym. QazAqparat - Búgin - orystyń uly aqyny Aleksandr Sergeevıch Pýshkınniń týǵan kúni. Aqyn esimi oraldyqtar úshin erekshe jaqyn. Óıtkeni Oral - Aleksandr Pýshkın at basyn tirep, aıaldaǵan Qazaqstandaǵy jalǵyz qala.
Sondyqtan jyl saıyn aqynnyń týǵan kúnine oraı onyń eskertkishine oraldyqtar gúl shoǵyn qoıyp, óleńderin oqýdy dástúrge aınaldyrǵan. Bul joly da qala turǵyndary aqyn rýhyna taǵzym etti. A.Pýshkın mýzeıiniń meńgerýshisi Sara Tanabaeva jınalǵandar aldynda aqynnyń Oralǵa kelgeni, sol saparynyń nátıjesinde «Pýgachev búliginiń tarıhy», «Kapıtan qyzy» atty kitaptar jazǵany jóninde áńgimelep berdi. Oralda turatyn Pýshkınge qatty uqsaıtyn Vladımır Býkreev, №1 orta mektep pen №6 «Sholpan» balabaqshasynyń shákirt-tárbıelenýshileri óleńder oqydy.
Aqynnyń týǵan kúnine oraı mereke, ásirese, A.Pýshkın mýzeıinde áserli ótti. Mundaǵy sharaǵa Reseıdiń Oraldaǵy konsýly Sergeı Prohorov qatysty. Kontsertte aqyn óleńderine jazylǵan romanstar oryndalyp, teatrlandyrylǵan kórinister qoıyldy.
