Oralda 91 kóshege jańa ataý berilmek
ORAL. QazAqparat - Oral qalasynda 91 kóshege jańa ataý berilmek, dep habarlaıdy QazAqparat tilshisi.
BQO tilderdi damytý basqarmasynyń basshysy Aıgúl Myńbaevanyń aıtýynsha, bul - «Juldyz» shaǵynaýdanyndaǵy jáne Derkól kentindegi jańa kósheler.
Oǵan qosa QR Úkimeti janyndaǵy respýblıkalyq onomastıkalyq komıssııanyń qaraýyna Oral qalasy boıynsha 3 shaǵynaýdan, 1 alań jáne 1 tynymbaqqa ataý berýge qatysty usynystar joldandy.
Sonymen qatar Tasqala aýdanynyń ıdeologııalyq turǵydan eskirgen 8 bilim berý uıymyn qaıta ataý usynyldy.
Jalpy, osy kezge deıin oblystyq onomastıkalyq komıssııaǵa aýdandar men qaladan 143 túsip, sonyń nátıjesinde 127 kóshe men 4 eldi mekenge ataý berý (qaıta ataý) qoldaý tapty. Sondaı-aq Syrym men Qaztalov aýdandaryndaǵy jańadan boı kótergen kóshelerge Astana, Astanaǵa - 20 jyl ataýlary berildi.
«QR Prezıdenti Ákimshiliginiń 2017 jylǵy 28 aqpandaǵy tapsyrmasyna sáıkes óńirde ıdeologııalyq turǵydan eskirgen, qaıtalanatyn ataýlardy tarıhı jer-sý ataýlary jáne ulttyq tanymǵa jaqyn dástúrli ataýlarmen ózgertý boıynsha da jumystar atqarylýda. Atap aıtsaq, Shyńǵyrlaý aýdanynyń úsh eldi mekeniniń, oblys boıynsha 54 kósheniń ataýy ózgertildi», - dedi Aıgúl Ádilgereıqyzy.
