Oralda 90-ǵa jýyq adamdy kene shaqty
ORAL. QazAqparat - Oral qalasynda 84 adamdy kene shaqty, dep habarlaıdy QazAqparat tilshisi.
Oral qalalyq qoǵamdyq densaýlyq saqtaý basqarmasynyń basshysy Mádenıet Tanaýovtyń aıtýynsha, mundaı jaıt 12 sáýirden beri tirkelgen.
Olardyń bári aýrýhanaǵa, jaraqat pýnktine kelip, kenelerin aldyrǵan. Qan synamalaryn alyp teksergende, týlıaremııa aýrýy eshkimnen anyqtalǵan joq.
«Kene shaǵý oqıǵalary bolyp turady. Eń bastysy, týlıaremııa sııaqty juqpaly aýrýdy juqtyrmasa boldy», - dedi M.Tanaýov.
Sol sekildi qalada jyl basynan beri bes adamnyń vırýsty gepatıttiń A túrimen aýyrǵany tirkeldi. Ótken jyly osy merzimde 4 adam naýqastanǵan edi. Muny da qalypty jaǵdaı deýge bolady.
Bul dert jemis-jıdekti jýmaı jegen jaǵdaıda juǵady, las jerlerden de taraýy múmkin. Sondyqtan jazǵa qaraı kóbeıýi yqtımal.
«Aýyrǵan adamdarmen baılanysta bolǵandardyń bári de baqylandy. Olardyń arasynan gepatıttiń A túri tirkelgen joq. Eń mańyzdysy, aýrýdyń órship, adamdardyń jappaı aýyrýyna jol bermeý qajet», - dedi Mádenıet Tanaýov.
