Oralda 9 jasar balanyń batýtta jaraqattanýyna baılanysty qylmystyq is qozǵaldy
Oralda batýt ortalyǵynda 9 jasar balanyń jaraqat alýyna baılanysty qylmystyq is qozǵaldy, dep habarlaıdy Kazinform.
BQO polıtsııa departamentiniń baspasóz qyzmetinen málim etkenindeı, oqıǵa 29 qazan kúni saǵat 15.30-da «Sky Jamp» batýt ortalyǵynda boldy.
Osynda oınap júrgen 9 jasar bala jaraqat alyp, aýrýhanaǵa jatqyzyldy.
Atalǵan derek boıynsha QR QK 306-baby 2-bóligine (qaýipsizdik talaptaryna saı kelmeıtin taýarlardy shyǵarý nemese satý, jumystardy oryndaý ne qyzmetter kórsetý) sáıkes sotqa deıingi tergeý amaldary júrgizilýde.
Atalǵan bap boıynsha aıypty dep tanylǵan adam belgili bir laýazymdardy atqarý nemese belgili bir qyzmetpen aınalysý quqyǵynan úsh jylǵa deıingi merzimge aıyra otyryp nemese onsyz, bes myń aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna ne bir myń eki júz saǵatqa deıingi merzimge qoǵamdyq jumystarǵa tartýǵa ne bes jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady.
BQO densaýlyq saqtaý basqarmasy baspasóz qyzmetiniń naqtylaýynsha, bala ákesimen birge jedel járdem kóligimen saǵat 17.10-da oblystyq kópbeıindi balalar aýrýhanasyna jetkizilgen.
«Sol kúni shuǵyl emdeý jasalǵan. 6 qarasha kúni saǵat 12.00-de qanaǵattanarlyq kúıde odan ári ambýlatorlyq emdeý úshin úıine shyǵaryldy. Nevrolog, hırýg jáne pedıatrdyń baqylaýynda bolyp, dene tárbıesi sabaǵynan bosatylady», dep habarlady vedomstvodan.
Balasynyń batýt ortalyǵynda jaraqat alǵany jóninde Tatıana degen anasy áleýmettik jelide jazdy.
Onyń málimdeýinshe, uly sol kúni synyptasynyń týǵan kúnine baılanysty «Sky Jump» ortalyǵyna baryp, basynan jaraqat alǵan. Saldarynan basyna shuǵyl ota jasalǵan. Kýágerlerdiń sózine qaraǵanda, ol batýttan jumsaq jerge sekirgen. Artynan bir adam (balalardyń aıtýynsha, ortalyq qyzmetkeri) sekirip, aıaǵymen basynan soqqan.
«Ota kezinde kámeletke tolmaǵandar isi jónindegi ınspektorlar kelip, kúıeýim kinálilerdi tabý úshin aryz jazdy. Kóp uzamaı eki apta bolady, eshqandaı jańalyq joq. Tergeýshi eshkimnen jaýap alǵan joq. Tergeýshi balaǵa ota jasalyp, aýrýhanada jatqanyn da bilmeıdi. Batýt ortalyǵynyń basshylyǵy tarapynan eshkim habarlasyp, balanyń jaǵdaıyn suraǵan joq. Sol kúni balalarmen qaýipsizdik tehnıkasyn saqtaý jóninde eshqandaı nusqaýlyq júrgizilmegen. Balanyń basynan qan shapshyǵan kezde dári-dármek qobdıshasy bolmaǵan, qyzmetkerler salfetka ákelgen. Balam shaıbaly hokkeımen aınalysatyn edi. Endi sportpen aınalysýdyń ózi muń bolyp tur», - dep jazdy Tatıana.
