Oralda 9-synyp oqýshysy sýǵa batyp ketti
ORAL. KAZINFORM — Oral qalasyna qarasty Krýgloozernyı kentinde jasóspirim qaza boldy.
BQO TJ departamenti bastyǵynyń orynbasary Eldos Battalovtyń óńirlik kommýnıkatsııalar qyzmeti alańynda ótken brıfıngte málim etkenindeı, qaıǵyly oqıǵa 18 mamyr kúni saǵat 19:30-da boldy.
Onyń sózine qaraǵanda, oqıǵa ornynda qutqarýshylar men TJD basqarmalarynan qyzmetkerler tehnıkalarmen jumys istedi.
— Saǵat 20:32-de 2011 jylǵy 9-synyp oqýshysynyń denesi Kóshim kanalynan shyǵaryldy. Jasóspirim arnaıy jabdyqtalmaǵan jerde shomylý kezinde sýǵa batyp ketken, — dedi Eldos Battalov.
Bul — osymen Oral qalasyndaǵy ekinshi qaıǵyly oqıǵa. Budan buryn 16 mamyr kúni «Teleortalyq» shaǵynaýdany «Krıstall» saıajaı qoǵamynda eresekterdiń qaraýynsyz jaǵalaýda oınap júrgen 2014 jylǵy bala Shaǵan ózenine qulap, batyp ketken bolatyn.
Departament málimetine qaraǵanda, jyl basynan beri sý aıdyndaryndaǵy qaýipsizdik qaǵıdalaryn buzǵany úshin QR Ákimshilik quqyq buzýshylyq týraly kodeksiniń 412-babyna sáıkes 4 adam jaýapkershilikke tartylyp, olarǵa 91 824 teńge aıyppul salyndy.
Eske sala keteıik, budan buryn Batys Qazaqstanda shomylýǵa arnalǵan 34 oryn belgilengenin jazǵan edik.
Oralda 12 jastaǵy bala ózenge batyp ketti.
