Oralda 9 ret qylmystyq jaýapkershilikke tartylǵan qaraqshy qolǵa tústi
ORAL. QazAqparat - Oralda bir táýlikte úsh birdeı kisi tonaý oqıǵasy tirkeldi, dep habarlaıdy QazAqparat tilshisi.
Oral qalasy polıtsııa basqarmasy jergilikti polıtsııa qyzmeti bóliminiń aǵa ınspektory, polıtsııa maıory Dınara Ábdilqalyqovanyń aıtýynsha, olardyń bári izi sýymaı ashyldy.
24 maýsym kúni saǵat shamamen 03.30-da azıat pishindes eki adam Máskeý kóshesi boıyndaǵy «Dostar» kafesi janynda 1993 jylǵy turǵynnyń quny 45 myń teńge turatyn «Samsýng A-3» uıaly telefonyn tartyp alǵan.
Jedel izdestirý sharalary barysynda kúdiktiler anyqtalyp, qolǵa tústi. Olardyń biri - Terekti aýdanynyń 1982 jylǵy turǵynynan eshqaıda ketpeý jóninde qolhat alyndy. Ekinshisi - turǵylyqty mekenjaıy joq 1973 jylǵy turǵyn Oral qalasy polıtsııa basqarmasynyń qabyldap-bólý ornyna qamaldy. QR QK 191-baby 1-bóligi boıynsha qylmystyq is qozǵalyp, tergeý júrgizilýde.
Sol kúni saǵat 17.30-da H.Chýrın kóshesi boıynda 1993 jylǵy ekinshi top múgedegine shabýyl jasaldy. Belgisiz bireý kúsh kórsetip, odan sómkesin tartyp alǵan. Sómkede 5 myń teńge aqshasy bar ámııan men eki bankomat kartasy bolǵan.
Kúdikti budan buryn 9 ret qylmystyq jaýapkershilikke tartylǵan 46 jasar qala turǵyny bolyp shyqty. Ol kisi tonaǵany úshin úsh márte sottalǵan, urlyq jasaǵany úshin birneshe ret isti bolǵan. Oǵan qosa qaraqshylyq shabýyl jasaǵany úshin bir ret sottalǵan. Budan birneshe jyl buryn túrmeden bosap shyqqan ol endi taǵy da zań aldynda jaýap beredi. Bul kúdiktige QR QK 191-baby 2-bóligine sáıkes múlkin tárkileýmen birge 3 jyldan 7 jylǵa deıin bas bostandyǵynan aıyrý jazasy kesilýi múmkin.
Sondaı-aq keshe saǵat 22.30-da azıat pishindes 30-35 jastaǵy kisi tonaýshy A.Qusaıynov kóshesi boıyndaǵy «Yrys» kafesiniń qasynan 2000 jylǵy turǵynnyń 50 myń teńge turatyn «Redmı» uıaly telefonyn tartyp alǵan. Oral qalasynyń 1987 jylǵy turǵyny ustalyp, kinásin moıyndady. Bul derek boıynsha da QR QK 191-baby 1-bóligine sáıkes qylmystyq is qozǵaldy.
