Oralda 9 gektar jerdiń qurǵaq shóbi órtendi
ORAL. QazAqparat – Oralda 9 gektar jerdiń qurǵaq shóbi órtendi, dep habarlaıdy QazAqparat tilshisi.
BQO TJ departamenti zilzalalardyń qaýip-qaterin azaıtý jáne azamattyq qorǵaý salasyndaǵy baqylaý basqarmasynyń bastyǵy Erlan Tóregeldıevtiń málim etkenindeı, 10 sáýir kúni Zachagan kentinde eki jerde qurǵaq shóp jandy.
Oqıǵa ornynda 4 tehnıka, 19 adam jumys istedi. «Tilsiz jaý» saǵat 20.55-te aýyzdyqtaldy.
Eger órt ýaqytynda sóndirilmegen jaǵdaıda ot turǵyn úılerge aýysýy yqtımal edi.
Jeldiń kúsheıýine baılanysty turǵyndar da mazasyzdanyp, tıisti organdarǵa qońyraý shalyp jatty.
«Bıyl qysta qar az túskendikten, tabıǵı órt kóbeıip ketti. Kún saıyn óńirde ondaǵan órt oqıǵasy tirkelýde. Tek sońǵy úsh aptada barlyǵy 400-den astam gektardy sharpyǵan eki orman órti, alpystan astam tabıǵı janý boldy. Kóktemde turǵyndar qýraǵan shópti jaǵady, alaıda onyń sońy órtke ulasyp ketýi múmkin ekendigin eskere bermeıdi», dedi QazAqparat tilshisine E.Tóregeldıev.
Eske sala keteıik, budan buryn Oralda «Master» dúkeni órtengenin jazǵan bolatynbyz.
