Oralda 87 jastaǵy qarııa mektepke shabýyl jasalady dep polıtsııany aldaǵan

ORAL. QazAqparat – Oralda 87 jastaǵy qarııa mektepke shabýyl jasalady dep jalǵan habar bergen, dep habarlaıdy QazAqparat tilshisi.

BQO polıtsııa departamentiniń baspasóz qyzmetinen málim etkendeı, qazirgi kezde tergeý amaldary júrgizilip jatyr.

«Oqıǵa 25 tamyz kúni boldy. 1935 jylǵy zeınetker úıinde otyryp, saǵat 02.25-te óziniń uıaly telefonynan úsh saǵattan keıin №20 orta mektepke nemese Zachagan polıtsııa bólimine shabýyl jasalady dep habarlaǵan. Atalǵan qylmysqa kúdikti retinde 87 jastaǵy qarııa anyqtalyp, ustaldy. Onyń ústinen QR QK 273-babyna (terrorızm aktisi týraly kórineý jalǵan habarlaý) sáıkes qylmystyq is qozǵaldy. Bul bap boıynsha aıypty dep tanylǵan adam bes myń aılyq eseptik kórsetkish mólsherinde aıyppul salýǵa ne sol mólsherde túzeý jumystaryna ne bes jylǵa deıingi merzimde bas bostandyǵyn shekteýge nemese sol merzimge bas bostandyǵynan aıyrýǵa jazalanady», - dep habarlady vedomstvodan.

Eske sala keteıik, budan buryn Batys Qazaqstanda bir kúnde jol apatynan eki adamnyń qaza tapqanyn jazǵan bolatynbyz.