Oralda 8 jasar bala úsh avtomobıldi urlap ketken
ASTANA. QazAqparat - Oralda úsh avtomobıldi urlaǵan 8 jasar Nıkolaı Kertsman pedagogtar qadaǵalaıtyn tehnıkalyq úıirmege berildi, dep habarlaıdy QazAqparat «Moı gorod» portalyna silteme jasap.
Ekinshi synyp oqýshysy endi urlyq jasamaýǵa ýáde berdi.
Kámeletke tolmaǵandar isteri jónindegi komıssııa 13 tamyz kúni bir aptada 3 avtomashınany urlaǵan 8 jasar Nıkolaı Kertsmannyń isin qarady.
Bala oqıtyn mekteptiń dırektory men synyp jetekshisiniń aıtýynsha, Nıkolaı aýqatty otbasynyń balasy. Onyń mundaı áreketke barýyna ózinen úlken 4 jas Nıkıta sebep bolýy múmkin.
«Nıkıta maǵan mashınaǵa min dedi. Biraq ózi otyrǵan joq. Men mashınaǵa minip, aıdap kettim. Jaman is istegenimdi bilemin, basqa bulaı etpeýge ýáde beremin», - deıdi Nıkolaı.
Otyrys qorytyndylary boıynsha, komıssııa balanyń ata-anasyn QR Ákimshilik quqyq buzýshylyqtar týraly kodeksiniń 127-babyna («Ata-ananyń nemese basqa da zańdy ókilderdiń balalardy tárbıeleý jónindegi mindetterdi oryndamaýy») sáıkes ákimshilik jaýapqa tartýǵa uıǵardy. Osy jaǵdaı endigári qaıtalansa, ata-ana quqyǵynan aıyrylýy múmkin.
Al Nıkolaıdy joǵary synyp oqýshylarymen jolyqtyrmaýǵa sheshim qabyldandy. Budan bólek, qalalyq bilim bólimine balany tehnıkalyq úıirmege berý tapsyryldy. Ol jerde Nıkolaı pedagogtardyń qadaǵalaýynda tehnıkanyń qyr-syryn úırene alady.
Іs materıaldaryna qaraǵanda, Nıkolaı bir aptada úsh avtomobıldi urlaǵan. 6 tamyz kúni keshkisin «Sýzýkı» avtomobılin urlap, jolda «Lada Grantaǵa» soqtyǵysyp, toqtaǵan. 9 tamyzda Nıkolaı kezekti ret «ańǵa» shyǵyp, «Toıota» markaly avtomobıldi qoldy etpek bolǵan. Biraq jolda kólikti kópirdiń baǵanasyna soqqan. Úshinshi ret «Hyundai» jeńil kóligin aıdap ketken. Bul joly da rýldi basqara almaı, beton tosqaýylǵa baryp soǵylǵan.
Abyroı bolǵanda, balanyń urlyǵynan eshkim zardap shekpegen. Biraq endi ákesi 1,4 mıllıon teńge mólsherinde materıaldyq zalaldy tóleýge mindetti.
Bir aıta keterligi, mektep dırektorynyń aıtýynsha, Nıkolaı sabaqty jaqsy oqıdy.
