Oralda 8,1 mlrd teńgege qala joldary jóndelýde
ORAL. QazAqparat - Bıyl Oralda qala joldaryn jóndeýge barlyq qarjy kózderinen 8,1 mlrd. teńge bólinip, 67 kóshe retke keltirile bastady, dep habarlaıdy «QazAqparat» tilshisi.
Sonyń biri - Jáńgir han kóshesinde jol jańa tehnologııa boıynsha orta jóndeýden ótkizilýde. Qurylys barysymen tanysqan Oral qalasynyń ákimi Murat Muqaev mundaı joldyń paıdalaný merzimi keminde on jylǵa sozylatynyn, sondyqtan aldaǵy jyly jóndeý jumystarynyń tolyqtaı osy tehnologııamen atqarylatynyn jetkizdi. Oraldy Zachagan kentimen jalǵastyratyn Chagano-Naberejnaıa kóshesine deıingi jol bóliginiń uzyndyǵy - 2,8 shaqyrym. Qazirgi tańda joldyń bir baǵytyna asfaltty betonnyń tómengi qabaty tóseldi. Merdiger uıym - «AksaıBıznesStroı» JShS 307,572 mln. teńgege baǵalanǵan qurylys-montaj jumystaryn aldaǵy qazan aıynda aıaqtamaqshy. Oǵan qosa Jáńgir han men Chagano-Naberejnaıa jáne Jáńgir han men Svobodnaıa kósheleriniń qıylysynda baǵdarsham ornatylmaq. Óıtkeni osy qıylystarda jol rettelmeıtindikten, apatty jaǵdaılar jıi oryn alady.
Qala basshysy sondaı-aq Frýnze kóshesindegi jol men Ǵ.Toqaı kóshesindegi jaıaý júrginshi jolynyń qurylysymen tanysty.
Aıta keteıik, bıyl 67 kóshede 72 shaqyrym joldy jóndeý kózdelgen bolatyn. Sonyń 42 shaqyrymy kúrdeli jóndelip, qaıta rettelse, 30 shaqyrymy jańadan tóselýde. Oǵan qosa 40 shaqyrym jaıaý júrginshi joly salynýda.
Qala joldarynyń jalpy uzyndyǵy 608 km bolsa, sonyń 296 shaqyrymyna nemese 48,7 paıyzyna ǵana asfalt tóselgen. Jyl sońyna taman bul kórsetkish 53,6 paıyzǵa jetpekshi.
