Oralda 72 jastaǵy zeınetkerdi óltirgen kúdikti tórtinshi balasyn ızolıatorda bosandy
BQO sotynyń baspasóz qyzmetinen málim etkenindeı, 22 tamyz kúni kúdikti áıeldi qamaýda ustaý túri ózgertilip, 1 aı merzimge úıqamaqqa aýystyryldy.
Oral qalasy mamandandyrylǵan tergeý sotynyń osyndaı qaýlysy shyqty.
«Buǵan barlyq qajetti tergeý amaldarynyń tolyq kólemde júrgizilgeni negiz boldy. Tek saraptama qorytyndysyn qosý ǵana qaldy. Sonymen qatar kúdiktiniń buryn sottalmaǵany, turǵylyqty mekenjaıynyń jáne tórt kishkentaı balasynyń bar ekendigi eskerildi. Tórtinshi balasyn áıel 19 tamyz kúni tergeý ızolıatorynda bosanǵan. Úıqamaqta otyrýyna baılanysty ol sotqa deıingi óndiristiń obektıvti jáne jan-jaqty júrgizilýine yqpal ete almaıdy», dep habarlady vedomstvodan.
Sot qaýlysy kúshine engen joq.
Eske sala keteıik, budan buryn Oralda 72 jastaǵy zeınetker áıeldi pyshaqtap óltirgen kúdiktiniń ustalǵanyn jazǵan bolatynbyz.