Oralda 72 jastaǵy zeınetker áıeldi pyshaqtap óltirgen kúdikti ustaldy
BQO polıtsııa departamenti bastyǵynyń orynbasary Baqyt Ashkarovtyń málim etkenindeı, 9 naýryz kúni Zachagan kentinde bolǵan qandy oqıǵa qoǵamdyq pikirdi týǵyzǵan edi.
Qaskúnem zeınetkerdi óltirip qana qoımaı, onyń altyn buıymdaryn da úptep ketken bolatyn.
Qylmystyń aýyrlyǵyn eskere otyryp, departament bastyǵy Maqsuthan Ablazımovtyń buıryǵymen tájirıbeli qyzmetkerlerden jedel tergeý toby quryldy.
B.Ashkarovtyń sózine qaraǵanda, marqumnyń tús mezgilinde, saǵat 13.00-15.00 aralyǵynda úıde jalǵyz bolǵan kezde óltirilgeni anyqtaldy.
Jábirlenýshi qarapaıym zeınetker edi, kóp aqshasy da bolmaǵan, eshkimmen sózge kelmegen, qaıyrymdy kisi retinde sıpattaldy.
«Kúdiktini anyqtaý maqsatynda qylmys bolǵan aýdanda 700-den astam úı qaraldy. 21 kún ishinde 1 myńdaı adam súzgiden ótkizildi. Naqty dáleldemeler negizinde Oral qalasynda turatyn 35 jastaǵy áıel anyqtalyp, qolǵa tústi. Ol buryn sottalmaǵan, ishki ister organdarynda esepte turmaǵan. Kúdiktiniń meken-jaıyn tintý barysynda qanǵa bókken kıim, qylmys quraly – pyshaq, basqa da aıǵaqtar tabyldy. QR Qylmystyq is júrgizý kodeksiniń 128-baby tártibimen kúdikti ustalyp, ýaqytsha oqshaýlaý ızolıatoryna qamaldy. Ony eki aı merzimge qamaýda ustaý sotpen sanktsııalandy. Buljytpas dáleldemeler bola tura, kúdikti asa aýyr qylmys jasaǵanyn moıyndaǵan joq. Túpkilikti sheshim sotpen qabyldanatyn bolady», dedi B.Ashkarov.
Eske sala keteıik, budan buryn BQO-da 72 jastaǵy áıeldi óltirgen kúdiktiniń izdestirilip jatqanyn jazǵan bolatynbyz.