Oralda 6 temir konteıner men eki úı órtendi
ORAL. QazAqparat – Oral qalasynda eki turǵyn úı men konteınerler órtendi, dep habarlaıdy QazAqparat tilshisi.
BQO TJ departamentiniń baspasóz qyzmetinen alynǵan málimetke qaraǵanda, 11 tamyz kúni saǵat 17.44-te N.Sydyqov kóshesi 42-mekenjaıynda órt shyqqany jóninde habar túsken.
Áýeli aýmaǵy 140 sharshy metr jerleý qyzmetterine arnalǵan taýarlar saqtalatyn 5 temir konteıner men turǵyn úı (80 sharshy metr) otqa orandy. Sodan keıin jalyn soǵan japsarlas ornalasqan konteıner (25 sharshy metr) men kórshi úıdiń tóbesin (80 sharshy metr) sharpyǵan.
TJ departamenti qyzmetkerleri oqıǵa ornynan bir ottegi ballonyn (kólemi – 70 lıtr) alyp shyqty.
Órtti (jalpy aýmaǵy – 325 sharshy metr) sóndirýge 50 adam, 16 tehnıka jumyldyryldy. «Tilsiz jaý» saǵat 19.30-da aýyzdyqtaldy.
Zardap shekkender joq.
Aldyn ala málimet boıynsha órt otpen abaı bolmaýdan shyqqan.
Eske sala keteıik, budan buryn Oralda eki kópqabatty turǵyn úıden órt shyǵyp, 20-ǵa jýyq adam evakýatsııalanǵanyn jazǵan bolatynbyz.
