Oralda 54 jastaǵy er adamnyń ólimine qatysty kúdikti ustaldy

Oral qalasynda 54 jastaǵy er adamnyń ólimine qatysty kúdikti ustaldy, dep habarlaıdy Kazinform.

BQO polıtsııa departamentiniń baspasóz qyzmetinen málim etkenindeı, oqıǵa 11 qarasha kúni boldy.

«Saǵat 10.05-te oblystyq kópbeıindi aýrýhanaǵa 1969 jylǵy er adam jetkizilgen. Alǵan jaraqattary saldarynan ol aýrýhanada qaıtys boldy. Múrde sot-medıtsınalyq saraptamaǵa jiberildi. Jedel izdestirý is-sharalary barysynda atalǵan qylmysty jasady degen kúdikpen Oral qalasynyń buryn sottalmaǵan 1981 jylǵy turǵyny anyqtalyp, ustaldy. Kúdikti Oral qalasy polıtsııa basqarmasynyń ýaqytsha ustaý ızolıatoryna qamaldy. Atalǵan derek boıynsha QR QK 106-baby 3-bóligine (abaısyzda jábirlenýshiniń ólimine ákep soqqan densaýlyqqa qasaqana aýyr zııan keltirý) sáıkes sotqa deıingi tergeý amaldary júrgizilýde», dep habarlady vedomstvodan.

Aıta keteıik, áleýmettik jelide marqumnyń kásipker bolǵandyǵy jazylyp jatyr.